Sunil Chhetri Controversial Goal : सुनील छेत्रीच्या गोलवरून राडा, केरळ ब्लास्टर्स संघानं मैदान सोडलं

Sunil Chhetri gaol Indian Super League Contoversy : इंडियन सुपर लीगमध्ये (ISL) शुक्रवारी (३ मार्च) बेंगळुरू एफसी आणि केरळ ब्लास्टर्स प्लेऑफचा सामना खेळला गेला. या सामन्यात चांगलाच राडा पाहायला मिळाला. त्यामुळे या सामन्याची सर्वत्र चर्चा रंगली आहे. बेंगळुरूच्या श्री कांतीरवा स्टेडियमवर हा प्लेऑफचा सामना खेळला गेला. या सामन्यादरम्यान बेंगळुरू आणि केरळच्या संघांमध्ये भांडण झाले. यानंतर केरळचे खेळाडू विरोध करत सामना मध्यंतरी सोडून थेट मैदानाबाहेर गेले.

सामन्याच्या अतिरिक्त वेळेत (एक्स्ट्रा टाइम) ही घटना घडली. बेंगळुरू एफसीचा कर्णधार सुनील छेत्रीने फ्री कीकवर एक गोल केला. यानंतर या सर्व राड्याला सुरुवात झाली. इंडियन सुपर लीगच्या इतिहासात एखाद्या निर्णयाच्या निषेधार्थ संघाने मैदानाबाहेर जाण्याची ही पहिलीच वेळ आहे.

नेमकं काय घडलं?

सामन्यात दोन्ही संघ निर्धारित वेळेपर्यंत ०-० असे बरोबरीत होते, त्यामुळे सामना अतिरिक्त वेळेत गेला. अतिरिक्त वेळेच्या पहिल्या हाफच्या ६व्या मिनिटाला मॅच रेफ्रीने बॉक्सबाहेरून बेंगळुरू एफसीला फ्री किक दिली. रेफ्रींच्या शिट्टीनंतर केरळचा गोलरक्षक आपल्या सहकारी खेळाडूंना काहीतरी सांगत होता, पण त्याचवेळी सुनील छेत्रीने फ्री किक घेतली आणि गोल झाला.

यानंतर यावर केरळचे खेळाडू आणि प्रशिक्षक म्हणाले की, गोलरक्षक तयार नव्हता, मग फ्री किकला परवानगी कशी दिली. लक्षात घेण्यासारखी गोष्ट म्हणजे फ्री किकचा निर्णय दिल्यानंतर रेफ्री खेळाडूंसमोर भिंत बांधतात आणि खुणाही करतात. पण, या फ्री किकदरम्यान असे काहीही दिसले नाही".

केरळ ब्लास्टर्सने रेफ्रिंशी वाद घातला

गोल केल्यानंतर बंगळुरूच्या खेळाडूंनी आपल्या घरच्या चाहत्यांसमोर आनंद साजरा केला. त्याचवेळी केरळ ब्लास्टर्सचे सर्बियन प्रशिक्षक इव्हान वुकोमानोविच यांनी आपल्या संघाला मैदानाबाहेर येण्याचा इशारा केला. वुकोमानोविच आणि त्यांच्या खेळाडूंनी मैदान सोडण्यापूर्वी सामना अधिकाऱ्यांशी वाद घातला. दुसरीकडे, बेंगळुरू संघ मैदानावर उभा राहिला आणि २० मिनिटे प्रतीक्षा केल्यानंतर, बेंगळुरू एफसीला विजेता घोषित करण्यात आले. बेंगळुरू एफसी आता उपांत्य फेरीत टेबल टॉपर्स मुंबई सिटीविरुद्ध खेळेल.