IND vs BAN 1st ODI: शाकिबच्या फिरकीसमोर टीम इंडिया १८६ धावांत गारद, केएल राहुल एकटाच लढला

भारत आणि बांगलादेश यांच्यात वनडे मालिका सुरू आहे. या मालिकेतील पहिल्या सामन्यात टीम इंडिया अवघ्या १८६ धावांत गारद झाली आहे. बांगलादेशच्या शाकिब अल हसनच्या फिरकीच्या जाळ्यात भारताचे ५ फलंदाज अडकले. भारताचा संपूर्ण संघ ४१.१ षटकात १८६ धावांवर ऑलआऊट झाला.

भारताकडून केएल राहुलने सर्वाधिक ७३ धावा केल्या. या सामन्यात राहुलने पाचव्या क्रमांकावर फलंदाजी करत अर्धशतक झळकावले. 

तत्पूर्वी, बांगलादेशचा कर्णधार लिटन दासने नाणेफेक जिंकून प्रथम गोलंदाजी करण्याचा निर्णय घेतला. हा निर्णय बांगलादेशी गोलंदाजांनी योग्य ठरवला. टीम इंडियाची सुरुवात चांगली झाली नाही. शिखर धवन (७) आणि रोहित शर्मा २७ धावा करून पॅव्हेलियनमध्ये परतले. शाकिबने रोहित शर्माला आपली पहिली शिकार बनवले. त्यानंतर त्याने विराटची शिकार केली. कोहलीला केवळ ९ धावा करता आल्या. 

केएल राहुल- सुंदर यांनी सावरला डाव

भारताची धावसंख्या ३ गडी बाद ४९ धावा अशी होती. या दरम्यान, श्रेयस अय्यर आणि राहुल यांच्यात भागीदारी होत असल्याचे दिसत होते, परंतु इबादत हुसेनने अय्यरचा डाव संपवला. श्रेयस अय्यरने ३९ चेंडूत २४ धावा केल्या. यानंतर वॉशिंग्टन सुंदर आणि राहुललने डाव सावरण्याचा प्रयत्न केला. दोघांनी ६० धावांची भागीदारी केली. शाकिबच्या चेंडूवर सुंदरने रिव्हर्स स्वीप खेळण्याचा प्रयत्न केला पण तो झेलबाद झाला. सुंदरने ४३ चेंडूत १९ धावा केल्या. 

या दरम्यान, केएल राहुलने एक बाजू लावून धरत ७० चेंडूत ७३ धावा केल्या. त्याच्या खेळीत ५ चौकार आणि ४ षटकारांचा समावेश होता. यानंतर शाकिबने शाहबाज अहमदला खातेही उघडू दिले नाही. शार्दुल ठाकूर (२२) हादेखील त्याचाच बळी ठरला.

बांगलादेशकडून शाकिब अल हसनने ५ तर इबादत हसनने ४ विकेट घेतल्या.