Suryakumar Yadav: सुर्याला आता खेळवणार नाही... कॅप्टन रोहित शर्माचं वक्तव्य चर्चेत

दक्षिण आफ्रिकेविरुद्ध T20 मध्ये सूर्यकुमार यादवने २२ चेंडूत ६१ धावांची शानदार खेळी केली. सध्या तो या वर्षातील टी-२० क्रिकेटमध्ये सर्वाधिक धावा करणारा फलंदाज आहे. या सोबतच सुर्या आंतरराष्ट्रीय T20 मध्ये सर्वात जलद १ हजार धावा पूर्ण करणारा फलंदाजही बनला आहे.

सुर्या सध्या जबरदस्त फॉर्मात आहे. याबद्दलच हर्षा भोगले यांनी प्रेझेंटेशनमध्ये कर्णधार रोहित शर्माला प्रश्न विचारला. यावर भारतीय कर्णधाराने थोडेसे धक्कादायक उत्तर दिले. या उत्तराची सध्या प्रचंड चर्चा सुरु आहे.

हर्षा भोगले यांनी रोहित शर्माला विचारले की, “सूर्यकुमार यादव ज्या प्रकारे धावा करत आहे, तु त्याचा फॉर्म कसा राखून ठेवशील? यावर रोहित शर्मा म्हणाला, 'मी विचार करत आहे की त्याला आता खेळवू नये. थेट २३ तारखेलाच (पाकिस्तानविरुद्ध) मैदानात उतरवले पाहिजे".

सोबतच रोहित म्हणाला, "खरे सांगायचे तर तो ज्या प्रकारच्या फॉर्ममध्ये आहे ते आश्चर्यकारक आहे. त्याला नेहमी खेळायचे असते. त्याला नेहमी काहीतरी चांगलं करायचं असतं. हेच त्यांला आनंदी ठेवते आणि त्याने कायम असेच आनंदी राहावे अशी आमची इच्छा आहे”.

सुर्याचा १७७+ चा जबरदस्त स्ट्राइक रेट

सूर्यकुमार यादवने गेल्या वर्षी मार्चमध्ये T20 आंतरराष्ट्रीय क्रिकेटमध्ये पदार्पण केले होते. आतापर्यंत त्याने ३३ सामने खेळले आहेत. यामध्ये त्याने ३९.८८ च्या सरासरीने १०३७ धावा केल्या आहेत. यादरम्यान त्याचा स्ट्राइक रेट चांगला राहिला. तो T20I मध्ये १७७.२६ च्या स्ट्राइक रेटने धावा करत आहे. या छोट्याशा कारकिर्दीत त्याने १ शतक आणि ९ अर्धशतकेही झळकावली आहेत.