Umran Malik: ‘ही’ चूक कधीच करू नकोस, मॅकग्राचा उमरानला लाखमोलाचा सल्ला

जगातील महान गोलंदाज ग्लेन मॅकग्राने टीम इंडियाचा युवा गोलंदाज उमरान मलिकला लाखमोलाचा सल्ला दिला आहे. मॅकग्राने उमरानच्या गोलंदाजीने चांगलाच प्रभावित झाला आहे. त्यामुळे मॅकग्राने भविष्यातील कामगिरी अधिक चांगली व्हावी, यासाठी उमरानला काही महत्वाच्या गोष्टी सांगितल्या आहेत. 

मॅकग्राने एका स्पोर्ट्स वेबसाईटशी बोलत होता. तो म्हणाला की, “जेव्हा वेगवान गोलंदाज त्यांच्या गोलंदाजीवर नियंत्रण मिळविण्यासाठी त्यांच्या वेगाशी तडजोड करतात तेव्हा मला खूप वाईट वाटते. 

यासोबतच त्याने भारताच्या उमरान मलिकचे कौतुक करत तो खूप प्रतिभावान गोलंदाज असल्याचे म्हटले आहे. गोलंदाजीवर नियंत्रण मिळवण्यासाठी त्याने वेगाशी तडजोड करू नये, असा सल्ला ग्लेन मॅकग्राने उमरानला दिला आहे. तसेच, तुम्ही कोणत्याही गोलंदाजाला १५० च्या स्पीडने गोलंदाजी करायला शिकवू शकत नाही. ही प्रतिभा नैसर्गिक असते.

सोबतच, “लाईन लेन्थवर नियंत्रण मिळवण्यासाठी गोलंदाज जेव्हा त्यांच्या वेगाशी तडजोड करतात तेव्हा मला त्यांची चीड येते. तुम्हाला जर तुमच्या गोलंदाजीवर नियंत्रण मिळवायचे असेल तर तुम्ही नेटमध्ये जास्त वेळ घालवला पाहिजे. तसेच, कठोर परिश्रम केले पाहिजेत. तुमची गती ही नैसर्गिक आहे. अशी शक्ती फार कमी गोलंदाजांकडे असते”, असेही ग्लेन मॅकग्रा म्हणाला.

मॅकग्रा हा एमआरएफ पेस फाऊंडेशनचा संचालक आहे. तो दरवर्षी तीन वेळा या फाऊंडेशनला भेट देतो. त्याच्या अकादमीत गोलंदाजांची निवड करताना तीन गोष्टी लक्षात घेतल्या जातात. गोलंदाजांची उंची, त्यांची शारीरिक ताकद आणि वेग यांच्या आधारावर युवा खेळाडूंची निवड केली जाते.