Marathi News 03 October Live: वैद्यक क्षेत्रासाठी नोबेल पुरस्कार जाहीर; स्वंते पाबो यांचा गौरव

समाजवादी पक्षाचे वरिष्ठ नेते आणि उत्तर प्रदेशचे माजी मुख्यमंत्री मुलायम सिंह यादव यांची प्रकृती आणखी बिघडल्याचं सांगण्यात येत आहे. त्यांना क्रिटिकल केअर युनिटमध्ये दाखल केलं आहे. मेदांता रुग्णालयाकडून ही माहिती देण्यात येत आहे. गेल्या १५ दिवसांपासून मुलायम सिंह यांच्यावर उपचार सुरू आहेत.

महाराष्ट्र नवनिर्माण टेलिकॉम सेनेचे अध्यक्ष सतीश नारकर यांचं पद वगळता या संघटनेची संपूर्ण कार्यकारिणी बरखास्त करण्यात आली आहे. नवीन कार्यकारिणी लवकरच जाहीर केली जाईल, असं मनसेनं प्रसिद्धीपत्रकाद्वारे कळवलं आहे.

समाजवादी चळवळीतील ज्येष्ठ नेते रमेश जोशी यांचं आज दुपारी १२.३० वाजता निधन झालं. पत्रकार साहिल जोशी यांचे ते वडील होत.

शिवसेनेचे आमदार रमेश लटके यांच्या निधनामुळं रिक्त झालेली अंधेरी पूर्व विधानसभा मतदारसंघाची पोटनिवडणूक जाहीर झाली आहे. या पोटनिवडणुकीचं मतदान ३ नोव्हेंबर रोजी होणार असून ६ नोव्हेंबर रोजी मतमोजणी होणार आहे. शिवसेनेत फूट पडल्यानंतरची ही पहिलीच मोठी निवडणूक आहे.

राहुल गांधी यांच्या नेतृत्वात सुरू असलेली काँग्रेसची भारत जोडो यात्रा लवकरच कर्नाटकात दाखल होणार असून काँग्रेसच्या अध्यक्षा सोनिया गांधी या देखील यात्रेत सहभागी होणार आहेत. येत्या ६ ऑक्टोबर रोजी त्या यात्रेत सहभागी होतील. ‘भारत जोडो’ यात्रा कर्नाटकात २१ दिवस चालणार असून ५११ किलोमीटरचं अंतर कापणार आहे.

मागील काही दिवसांपासून सातत्यानं गटांगळ्या खाणाऱ्या शेअर बाजारानं आज, आठवड्याच्या पहिल्या दिवशी लाल निशाण फडकावलं आहे. सेन्सेक्स २०० पेक्षा जास्त अंकांनी घसरला असून निफ्टीही ५० अंकांनी पडून ट्रेड करत आहे.

समाजवादी पक्षाचे प्रमुख अखिलेश यादव यांचे वडील आणि उत्तर प्रदेशचे माजी मुख्यमंत्री मुलायम सिंह यादव यांची प्रकृती गंभीर आहे. सध्या त्यांच्यावर रुग्णालयात उपचार सुरू आहेत. पंतप्रधान नरेंद्र मोदी यांनी अखिलेश यादव यांच्याशी फोनवरून चर्चा केली असून मुलायम सिंह यादव यांच्या प्रकृतीची विचारपूस केली. आवश्यक ती सर्व मदत करू असंही पंतप्रधान मोदींनी अखिलेश यादव यांना सांगितल्याचं म्हटलं जात आहे.

पंजाबी गायक अल्फाज याला भरधाव वाहनाने धडक दिली असून यात तो जखमी झाला आहे. एका धाब्याबाहेर उभा राहिला असताना त्याला गाडीने धडक दिली. यात जखमी झालेल्या अल्फाज याला रुग्णालयात दाखल कऱण्यात आले आहे. तर विकी नावाच्या व्यक्तीला पोलिसांनी अटक केलीय.

उत्तर प्रदेशातील बदोही इथं नवरात्रीनिमित्त घालण्यात आलेल्या मंडपाला आग लागल्याची घटना रविवारी रात्री घडली. या आगीत ६४ जण होरपळले असून दोन जणांचा मृत्यू झाला आहे. तर जखमींवर रुग्णालयात उपचार सुरू आहेत.