Live Blog: राज ठाकरेंचा अयोध्या दौरा स्थगित झाल्यानंतर NCP चा तिरकस टोला

राज ठाकरे यांचा अयोध्या दौरा तूर्तास स्थगित करण्यात आला आहे. यानंतर राष्ट्रवादी काँग्रेसने ट्विटरवरून मनसेला खोचक टोला लगावला आहे. “तूर्तास अयोध्या दौऱ्याचा भोंगा बंद ठेवण्याचा निर्णय घेण्यात आला आहे. जनतेच्या प्रश्नांवरून लक्ष हटविण्यासाठी नवीन भोंगा कोणता लावावा यावर विचारविनिमय सुरू आहे. सविस्तर बोलूच...” असं ट्विट राष्ट्रवादी काँग्रेसने केलं आहे.

काँग्रेसचे नेत नवज्योत सिंग सिद्धू यांना प्रकृतीचं कारण देत ३४ वर्षांपूर्वीच्या प्रकरणात शरणागती पत्करण्यासाठी आणखी वेळ देण्याची मागणी केली आहे. यावर न्यायाधीश ए एम खानविलकर यांनी हे प्रकरण सरन्यायाधीशांसमोर सादर करण्यास सांगितलं.

मनसेचे सरचिटणीस संदीप देशपांडे यांना न्यायालयाने जामीन मंजूर केला. त्यानंतर पत्रकारांशी बोलताना संदीप देशपांडे यांनी म्हटलं की, आमच्यावर जो गुन्हा दाखल केला तो खोटा होता, त्या खोट्या गुन्ह्यासाठी महाराष्ट्र पोलिस आम्हाला शोधत होते. कोणताही गुन्हा घडला नव्हता आणि आमचा धक्का लागला नव्हता. आम्ही सरकारविरोधात बोलू नये, थोबाड बंद रहावं म्हणून हा त्यांचा खटाटोप होता. आम्हाला न्यायालयाने न्याय दिला. केंद्र सरकार सुडाचं राजकारण करतं असा तुम्ही आरोप करताय, पण मग तुम्ही काय करताय असा प्रश्नही संदीप देशपांडे यांनी विचारला.

काश्मीरमध्ये जम्मू-श्रीनगर राष्ट्रीय महामार्गावर रामबन इथे खूनी नाला बोगद्याचा काही कोसळला आहे. यामध्ये दहा कर्मचारी अडकल्याची भीती व्यक्त केली जात आहे.

कर्नाटकात मुसळधार पावसामुळे अनेक भागात पूरस्थिती निर्माण झाली आहे. या पार्श्वभूमीवर धारवाड जिल्ह्यात शाळा आणि काॅलेजेस बंद राहणार आहेत.

राज ठाकरे यांचा अयोध्या दौरा तूर्तास स्थगित करण्यात आल्याची माहिती समजते. अयोध्या दौऱ्याची नवी तारीख लवकरच जाहीर करण्यात येणार आहे. दरम्यान, दौरा रद्द करण्याचे कारण अद्याप समोर आलेलं नाही.

बिहारचे माजी मुख्यमंत्री लालू प्रसाद यादव आणि त्यांची मुलगी मीसा भारती यांच्या घरासह १५ ठिकाणी सीबीआयने छापा टाकला आहे. त्याच्या कार्यकाळात भरतीमध्ये अनियमितता प्रकरणी नव्याने गुन्हा दाखल करण्यात आला आहे.

राज्यात वादळी वारे, वीजांच्या कडकडाटासह पावसाने जोरदार हजेरी लावली आहे. सिंधुदुर्ग, कोल्हापूर, सांगली, सोलापूर, नांदेड, जालना, यवतमाळ, वर्धा, नागपूरमध्ये जोरदार पाऊस पडला आहे. काल सायंकाळी सुरु झालेला पाऊस काही ठिकाणी अद्याप सुरु आहे. यामुळे पीकांचे मोठ्या प्रमाणावर नुकसान झाले आहे. येत्या दोन दिवसांत राज्यात कोकण, मध्य महाराष्ट्र, मराठवाड्यात तुरळक ठिकाणी पाऊस पडण्याची शक्यता असून, विदर्भातही मेघगर्जनेसह विजांचा कडकडाट होण्याची शक्यता हवामान विभागाने वर्तवली आहे.