Amazon summons : जबरदस्तीची नोकरकपात भोवली, अॅमेझाॅनला कामगार मंत्रालयाकडून मिळाली नोटीस

Amazon summons : जगभरातील माहिती तंत्रज्ञान क्षेत्रातील कंपन्यांमध्ये मोठ्या प्रमाणात कर्मचारी कपात केली जात आहे, गेल्या आठवड्यात ई काॅमर्स क्षेत्रातील कंपनी अॅमेझाॅननेही १० हजार कर्मचाऱ्यांना कामावरुन काढून टाकण्याची घोषणा केली. कंपनीने गेल्याच आठवड्यात कर्मचाऱ्यांना टर्मिनेशन लेटर पाठवण्यास सुरुवात केली. पण कंपनी आम्हाला जबरदस्तीने कामावरुन काढून टाकत आहे, अशी तक्रार कंपनीतील कर्मचाऱ्यांनी केल्यानंतर, ही टाळेबंदी कंपनीला चांगलीच भोवली आहे.यावर केंद्रीय कामगार मंत्रालयाने अ्ॅमेझाॅनला थेट नोटीस बजावी आहे.

उपलब्ध माहितीनुसार, केंद्रीय कामगार मंत्रालयाने अॅमेझॉन इंडियाला बुधवारी बेंगळुरू येथील उपमुख्य कामगार आयुक्तांसमोर हजर राहण्यासाठी समन्स बजावले आहे. या प्रकरणातील सर्व दस्तावेज घेऊन अधिकृत प्रतिनिधींद्वारे निश्चित केलेल्या तारखेला आणि वेळेवर उपस्थित राहण्यास सांगितले आहे.

ही बातमी देखील वाचा : amazon 

डेव्हलपमेंट एम्प्लॉईज युनियन इन्फॉर्मेशन टेक्नॉलॉजी एम्प्लॉईज सिनेट (एनआयटीईएस) ने केलेल्या तक्रारीनंतर केंद्रीय कामगार मंत्रालयाने हे पाऊल उचलले आहे. कामगार मंत्रालयाने अॅमेझॉनवर कामगार कायद्यांचे उल्लंघन केल्याचा आरोप केला आहे. केंद्रीय कामगार मंत्री भूपेंद्र यादव यांना लिहिलेल्या पत्रात एनआयटीईएसने दावा केलाय की अॅमेझाॅनने कर्मचाऱ्यांना कंपनीतून जबरदस्तीने काढून टाकण्यात आले आहे. कर्मचाऱ्यांना टर्मिनेशनची संपूर्ण प्रक्रिया पूर्ण करण्यासाठी ३० नोव्हेंबरपर्यंत मुदत देण्यात आली आहे. एवढ्या कमी कालावधीमध्ये दुसरी नोकरी शोधणे कठीण असल्याने कर्मचाऱ्यांच्या उदरनिर्वाहाचा प्रश्न एैरणीवर आला आहे.