Jet Airways CBI Raid: जेट एअरवेज व उद्योगपती नरेश गोयल यांच्याशी संबंधित ७ ठिकाणी सीबीआयचे छापे

Jet Airways CBI Raid: सीबीआयने रोख फसवणूकीप्रकरणी जेट एअरवेज आणि कंपनीचे संस्थापक नरेश गोयल यांच्या कार्यालयावर छापे टाकले. रिपोर्टनुसार, ५३८ कोटींच्या कथित फसवणूक प्रकरणात सीबीआयने ही तपास प्रक्रिया सुरू केली आहे. कॅनरा बँकेने रोख रकमेची फेरफार केल्याची तक्रार केल्यानंतर सीबीआयने ही कारवाई केली आहे. या प्रकरणात जेट एअरवेजचे संस्थापक, त्यांची पत्नी आणि माजी संचालकांना आरोपी करण्यात आले आहे. याआधीही फसवणूक प्रकरणी अंमलबजावणी संचालनालयाने बायजूस आणि मणप्पुरम फायनान्सच्या जागेवर छापे टाकले होते.

केंद्रीय अन्वेषण ब्युरो (सीबीआय) ने शुक्रवारी ५३८ कोटी रुपयांच्या कथित बँक फसवणुकीप्रकरणी जेट एअरवेज आणि तिचे संस्थापक नरेश गोयल यांच्या कार्यालयांसह सात ठिकाणी छापे टाकले. छाप्यांदरम्यान सीबीआयने मुंबईत अनेक ठिकाणी मोठ्या प्रमाणात झडती घेतली. सीबीआयने संस्थापक नरेश गोयल तसेच त्यांची पत्नी अनिता आणि माजी एअरलाइन डायरेक्टर गौरांग आनंद शेट्टी यांच्या निवासस्थानी आणि कार्यालयातील कागदपत्रांची झडती घेतली आहे. एएनआयच्या वृत्तानुसार, नरेश गोयल यांची पत्नी अनिता गोयल आणि इतरांना फसवणूक प्रकरणात आरोपी करण्यात आले होते.

सीबीआयने सांगितले की, कॅनरा बँकेच्या तक्रारीवरून ५३८ कोटी रुपयांच्या कथित बँक फसवणुकीचा नवीन गुन्हा दाखल करण्यात आला आहे. जेट एअरवेजने नुकतेच दिवाळखोरी जाहीर केली होती, राष्ट्रीय कंपनी कायदा न्यायाधिकरण (NCLT) मध्ये दिवाळखोरी रिझोल्यूशन प्रक्रियेअंतर्गत जालान कॅलरॉक कन्सोर्टियमने ही कंपनी अधिग्रहित केली आहे.