Adani Stocks : अदानी समूहात चाललंय काय?; एका बातमीनं कोसळले शेअर्स, गुंतवणूकदार हवालदिल

Adani Stocks : एफएमसीजी क्षेत्रातील कंपनी अदानी विल्मरच्या शेअर्समध्ये मोठी घसरण दिसत आहे. अदानी विल्मरच्या शेअर्समध्ये बीएसईवर ४.८ टक्क्यांपर्यंत कोसळले. ही घसरण प्रामुख्याने अदानी विल्मरशी संबंधित एका बातमीने निर्माण झाली आहे. अदानी समूह आपल्या एफएमसीजी व्हेंचर अदानी विल्मरमध्ये हिस्सा विक्रीसाठी खरेदीदाराच्या शोधात आहेत.

रिपोर्टनुसार, समूह अदानी विल्मरमध्ये आपला ४४ टक्के हिस्सा विक्री करण्याची शक्यता आहे. याचे मूल्य अंदाजे ६.१७ अब्ज डाॅलर्स आहे. अदानी विल्मर, अदानी एटरप्राईजेस आणि सिंगापूरच्या विल्मर इंटरनॅशनल लिमिटेडचे ज्वाईंट व्हेंचर आहे. या कंपनीचा फाॅर्च्यून ब्रड प्रसिद्ध आहे.

२०२२ मध्ये झाली होती लिस्टिंग

अदानी विल्मरची फेब्रुवारी २०२२ मध्ये लिस्टिंग झाली होती. त्याचा आयपीओ जानेवारी २०२२ मध्ये आला होता. त्याची इश्यू प्राईस २१८- २३० रुपये प्रति शेअर्स होती. या स्टाॅक्सने २८ एप्रिल २०२२ ला ८७८.३० रुपयांच्या उच्चांकी पातळीला स्पर्श केला होता.

अदानी समूहातील इतर शेअर्सची स्थिती

अदानी एटरप्राईजेस सुरूवातीच्या ट्रेडिंगमध्ये किंचित वाढीसह २४९४ रुपयांच्या पातळीवर ट्रेड करत होते. अदानी पोर्ट्स २ टक्के तेजीसह ८०० रुपयांवर ट्रेड करत आहेत. अदानी पावरच्या शेअर्समध्ये किंचित घट आहे. हा शेअर्स २७९.२० रुपयांवर ट्रेड करत होता. अदानी ट्रान्समिशनच्या शेर्समध्ये घसरण नोंदवत तो ८१६.३५ रुपये होता. तर अदानी ग्रीनमध्ये तेजीसह ९८० रुपये पातळी गाठली होती. अदानी टोटल गॅसच्या शेअर्समध्ये किंचील घसरण झाली होती.