GT Vs CSK : नरेंद्र मोदी स्टेडियमवर गुजरातचा दणदणीत विजय, चेन्नईच्या पराभवामुळे प्लेऑफची शर्यत रंजक

इंडियन प्रीमियर लीग २०२४ च्या ५९ व्या सामन्यात गुजरात टायटन्स आणि चेन्नई सुपर किंग्ज आमनेसामने होते. अहमदाबादच्या नरेंद्र मोदी स्टेडियमवर गुजरातने प्रथम फलंदाजी करताना २३१ धावा केल्या होत्या. प्रत्युत्तरात चेन्नईचा संघ केवळ १९६ धावाच करू शकला. 

गुजरातकडून शुभमन गिल आणि साई सुदर्शन यांनी शतके झळकावली आणि त्यानंतर मोहित शर्मा आणि रशीद खान यांनी गोलंदाजीत कमाल केली. मोहितने ३ तर रशीदने २ बळी घेतले.

सीएसकेकडून डॅरिल मिशेलने ६३ आणि मोईन अलीने ५६ धावा केल्या. चौथ्या विकेटसाठी या दोन फलंदाजांमध्ये १०९ धावांची भागीदारी झाली, पण मिचेल बाद झाल्यानंतर चेन्नईचा डाव पुन्हा एकदा गडगडला आणि त्यांना शेवटपर्यंत सावरता आले नाही.

या विजयासह गुजरातने प्लेऑफच्या आशा जिवंत ठेवल्या आहेत. त्याचवेळी चेन्नईच्या पराभवामुळे प्लेऑफची शर्यत रोमांचक बनली आहे. गुजरातच्या या विजयाने आरसीबीलाही प्लेऑफच्या शर्यतीत जिवंत ठेवले आहे.

गुजरात वि. सीएसके क्रिकेट स्कोअर

मिशेल बाद

चेन्नई सुपर किंग्जची चौथी विकेट १३व्या षटकात ११९ धावांवर पडली. डॅरिल मिशेल ३४ चेंडूत ६३ धावा करून पॅव्हेलियनमध्ये परतला. मोहित शर्माच्या चेंडूवर षटकार मारण्याच्या प्रयत्नात तो झेलबाद झाला.

सीएसेकला पहिल्याच षटकात दुहेरी धक्का

गुजरातने दिलेल्या २३२ धावांच्या लक्ष्याचा पाठलाग करण्यासाठी आलेल्या चेन्नईची सुरुवात चांगली झाली नाही. संघाला दुहेरी फटका बसला आहे. रचिन रवींद्र पहिल्याच षटकात धावबाद झाला, तर इम्पॅक्ट प्लेयर म्हणून खेळायला आलेल्या अजिंक्य रहाणेने संदीप वारियरच्या चेंडूवर सोपा झेल दिला. रचिन दोन चेंडूत १ धावा काढून बाद झाला, तर रहाणे ५ चेंडूत १ धाव काढून बाद झाला.

गुजरातच्या २३१ धावा

गुजरातने चेन्नईसमोर २३२ धावांचे लक्ष्य ठेवले आहे. नाणेफेक हारल्यानंतर प्रथम फलंदाजी करताना गुजरातने २० षटकांत ३ गडी गमावून २३१ धावा केल्या. कर्णधार शुभमन गिलने ५५ चेंडूत ९ चौकार आणि ६ षटकारांच्या मदतीने १०४ धावा केल्या तर साई सुदर्शनने ५१ चेंडूत ५ चौकार आणि ७ षटकारांच्या मदतीने १०३ धावा केल्या.

सुदर्शनचे हे पहिले आयपीएल शतक होते. त्याचवेळी शुभमनने आयपीएल कारकिर्दीतील चौथे शतक झळकावले. डेव्हिड मिलर ११ चेंडूत १६ धावा करून नाबाद राहिला. तर शाहरुख खान २ धावा करून धावबाद झाला. चेन्नईकडून तुषार देशपांडेने २ बळी घेतले. शुभमन आणि सुदर्शन यांच्यात २१० धावांची विक्रमी भागीदारी झाली.

गिल-सुदर्शन बाद

साई सुदर्शन ५१ चेंडूत १०३ धावा करून बाद झाला तर शुभमन गिल ५५ चेंडूत १०४ धावा करून बाद झाला. सुदर्शनने ५ चौकार आणि ७ षटकार मारले. तर गिलच्या बॅटमधून ९ चौकार आणि ५ षटकार आले. गुजरातचा स्कोअर १८ षटकांत २ बाद २१३ धावा आहे.

गिल-सुदर्शनची शतकं

शुभमन गिलने १७व्या षटकात शतक झळकावले. त्याने या मोसमातील पहिले शतक ५० चेंडूत ९ चौकार आणि ६ षटकारांच्या मदतीने झळकावले. याच षटकात साई सुदर्शननेही शतक झळकावले. त्याने आपले शतकही ५० चेंडूत पूर्ण केले. त्याच्या बॅटमधून ५ चौकार आणि ७ षटकार आले.

११व्या षटकात २३ धावा

सिमरजीत सिंगने ११व्या षटकात २३ धावा दिल्या. या षटकात गिलने एक षटकार तर सुदर्शनने दोन षटकार लगावले. ११ षटकांनंतर गुजरात टायटन्सची धावसंख्या एकही विकेट न गमावता १३० धावा आहे. साई सुदर्शन ३८ चेंडूत ७१ तर शुभमन गिल २८ चेंडूत ५७ धावांवर खेळत आहे.

साई सुदर्शनचे अर्धशतक

साई सुदर्शनने अवघ्या ३२ चेंडूत अर्धशतक झळकावले आहे. आतापर्यंत त्याने १ चौकार आणि ३ षटकार मारले आहेत. शुभमन गिल २१ चेंडूत ४० धावांवर खेळत आहे. त्याने ४ चौकार आणि २ षटकार मारले आहेत. ९ षटकांत गुजरातची धावसंख्या बिनबाद ९४ धावा आहे.

गुजरातची वेगवान सुरुवात

गुजरातने वेगवान सुरुवात केली आहे. संघाने तीन षटकांनंतर एकही विकेट न गमावता ३२ धावा केल्या आहेत. सध्या शुभमन गिल ८ चेंडूत २० धावा आणि साई सुदर्शन १० चेंडूत ११ धावा करून फलंदाजी करत आहे.

गुजरात टायटन्सचा डाव सुरू

गुजरात टायटन्सचा डाव सुरू झाला आहे. कर्णधार शुभमन गिलसह साई सुदर्शन गुजरातसाठी डावाची सुरुवात करण्यासाठी मैदानात उतरला आहे. चेन्नईसाठी फिरकीपटू मिचेल सँटनरने गोलंदाजीची सुरुवात केली आहे.

दोन्ही प्लेइंग इलेव्हन

गुजरात टायटन्स (प्लेइंग इलेव्हन): शुभमन गिल (कर्णधार), साई सुधारसन, शाहरुख खान, डेव्हिड मिलर, मॅथ्यू वेड (विकेटकीपर), राहुल तेवतिया, रशीद खान, नूर अहमद, उमेश यादव, मोहित शर्मा, कार्तिक त्यागी.

चेन्नई सुपर किंग्ज (प्लेइंग इलेव्हन): ऋतुराज गायकवाड (कर्णधार), रचिन रवींद्र, डॅरिल मिशेल, शिवम दुबे, मोईन अली, रवींद्र जडेजा, एमएस धोनी (विकेटकीपर), मिचेल सँटनर, शार्दुल ठाकूर, तुषार देशपांडे, सिमरजीत सिंग.

सीएसकेने टॉस जिंकला

चेन्नईचा कर्णधार ऋतुराज गायकवाडने नाणेफेक जिंकून प्रथम गोलंदाजी करण्याचा निर्णय घेतला आहे. या मोसमात ऋतुराजने नाणेफेक जिंकण्याची ही केवळ दुसरी वेळ आहे. त्याने १२ पैकी १० वेळा नाणेफेक गमावली आहे. 

सीएसकेच्या संघात बदल करण्यात आला आहे. रिचर्ड ग्लीसनच्या जागी रचिन रवींद्रने संघात आला आहे.

त्याचबरोबर गुजरातने संघात दोन बदल केले आहेत. मॅथ्यू वेडच्या जागी कार्तिक त्यागीचा प्लेईंग-११ आणि रिद्धिमान साहाच्या जागी जोशुआ लिटलचा समावेश करण्यात आला आहे. गुजरातसाठी वेगवान गोलंदाज कार्तिकचा हा पदार्पणाचा सामना आहे. याआधी तो सनरायझर्स हैदराबाद आणि राजस्थान रॉयल्सकडून खेळला आहे.