Kabaddi : राजाभाऊ देसाई स्मृती चषक कबड्डी स्पर्धेत रायगडच्या मिडलाईन अ‍ॅकॅडमीची बाजी, ठाणे महापालिकेच्या संघाचा पराभव

प्रभादेवीच्या चवन्नी गल्लीत जयश्री सावंत क्रीडानगरीत झालेला अंतिम सामना पाहाण्यासाठी हजारो कबड्डीप्रेमींनी गर्दी केली होती. मात्र, सामना अपेक्षेप्रमाणे रंगला नाही. मिडलाइन संघानं हा सामना जवळपास एकतर्फी जिंकला.

तत्पूर्वी, उपांत्य सामन्यात मिडलाइननं मुंबई पोस्टलविरुद्ध जोरदार खेळ दाखवत मध्यंतरालाच २१-१७ अशी आघाडी घेतली होती. मध्यंतरानंतर पोस्टलच्या सौरभ कुलकर्णी आणि शुभम रहाटेनं वेगवान खेळाच्या जोरावर संघाला बरोबरीत आणलं होतं. मात्र मिडलाईननं शेवटच्या क्षणी सामन्यावर आपली पकड मजबूत करत अंतिम फेरीत धडक मारली. शेवटची दोन मिनिटं असताना आघाडी घेत ३९-३२ अशा फरकानं मिडलाईननं विजयावर शिक्कामोर्तब केलं. त्यानंतर मिडलाइननं आपला हाच खेळ अंतिम फेरीतही कायम राखत कबड्डीप्रेमींना सहज कसं जिंकतात, याचं प्रात्यक्षिक दाखवलं.

हेही वाचा : आरसीबीच्या नव्या कर्णधाराची घोषणा; विराट कोहलीच्या नावाची चर्चा हवेतच विरली!

प्रफुल्ल झावरे आणि शुभम दिडनाथने अंतिम सामन्यात चढाई-पकडींचा सुसाट खेळ सादर करत मिडलाईनला मध्यंतराला २२-५ अशी जबरदस्त आघाडी मिळवून देत विजयपथावर नेले. मध्यंतरानंतर ठाणे महापालिकेच्या जावेद पठाण आणि सिद्धेश तटकरे यांनी मिडलाईनवर लोण चढवत सामन्यात रंगत आणण्याचा प्रयत्न केला, पण तो अपुरा ठरला. मिडलाईननं ३२-२२ अशा दणदणीत विजयासह स्वामी समर्थ क्रीडा मंडळाच्या राज्यस्तरीय कबड्डी स्पर्धेत आपलं पहिलं-वहिलं जेतेपद पटकावलं. त्यांचा प्रफुल्ल झावरे स्पर्धेतील सर्वोत्तम कबड्डीपटू ठरला. त्यांच्याच खेळानं मिडलाइनला अनपेक्षितपणे जेतेपद जिंकता आलं. त्यांचाच बिट्टू बनिवाल स्पर्धेतील सर्वोत्तम पकडवीर ठरला तर ठाणे महानगरपालिकेच्या साईराज कुंभारनं सर्वोत्कृष्ट चढाईपटूचा मान मिळवला.

उपांत्य सामन्यात रुपाली ज्वेलर्सचा पराभव

त्याआधी ठाणे महानगरपालिकेनं दुसर्‍या उपांत्य सामन्यात रुपाली ज्वेलर्सचा ४३-२४ असा धुव्वा उडवत अंतिम फेरीत धडक मारली होती. स्वामी समर्थ क्रीडा मंडळानं संघासह खेळाडूंवरही पारितोषिकांचा वर्षाव केला. स्पर्धेतील सर्वोत्तम खेळाडूला ५ ग्रॅम तर सर्वोत्तम चढाईपटू आणि पकडवीराला ३ ग्रॅम सोन्याच्या नाण्यानं सन्मानित करण्यात आलं. 

स्पर्धेचा पुरस्कार वितरण सोहळा आमदार सुनील शिंदे यांच्यासह स्पर्धेचे आयोजक आमदार महेश सावंत, मंडळाचे जयराम शेलार आणि शाखाप्रमुख संजय भगत यांच्या उपस्थितीत पार पडला.