Paris Olympics 2024 : प्रकाश पदुकोण यांनी माझा फोन हिसकावला, लक्ष्य सेनने केली पंतप्रधान मोदींकडे तक्रार

पॅरिस ऑलिम्पिकच्या समारोपानंतर लक्ष्य सेन आणि इतर खेळाडूंनी पंतप्रधान नरेंद्र मोदी यांची भेट घेतली. यादरम्यान खेळाडूंनी त्यांचे अनुभव पंतप्रधान मोदींसोबत शेअर केले.

लक्ष्य सेन नेमकं काय म्हणाला?

यावेळी लक्ष्य सेन म्हणाला की, प्रशिक्षक प्रकाश पदुकोण यांनी पॅरिस ऑलिम्पिकदरम्यान माझा फोन काढून घेतला होता, कारण त्यांना माझे संपूर्ण लक्ष खेळावर केंद्रित करायचे होते. सोशल मीडियावर जे काही चालू आहे त्यामुळे माझे लक्ष विचलित होऊ नये असे त्यांना वाटत होते.

लक्ष्य सेन म्हणाला, प्रकाश पदुकोण सर माझा फोन हिसकावून घ्यायचे. सामना संपल्यानंतर ते मला माझा फोन परत द्यायचे. त्यांनी मला खूप साथ दिली यात शंका नाही. मला असे म्हणायचे आहे की पॅरिस ऑलिम्पिक हा माझ्यासाठी खूप चांगला अनुभव होता, मला खूप काही शिकायला मिळाले.

तथापि, ते थोडे हृदय पिळवटून टाकणारेही होते, कारण पदकाच्या अगदी जवळ येऊनही तो पदक जिंकण्यात अपयशी ठरलो. पण पुढच्या वेळी मी शंभर टक्के देईन, माझ्या उणिवांवर काम करेन.

पॅरिस ऑलिम्पिकमध्ये लक्ष्य सेनला पदक जिंकता आले नाही, पण त्याने आपल्या खेळाने चाहत्यांची मने नक्कीच जिंकली. लक्ष्य सेनला उपांत्य फेरीत जागतिक क्रमवारीत अव्वल क्रमांकाचा खेळाडू व्हिक्टर एलक्सनने पराभूत केले.

ऑलिम्पिक खेळाडूंनी नरेंद्र मोदी यांची भेट घेतली

अशा प्रकारे लक्ष्य सेनचे पॅरिस ऑलिम्पिकमध्ये पदक जिंकण्याचे स्वप्न भंगले. लक्ष्य सेन उपांत्य फेरीत पराभूत झाल्यानंतर प्रशिक्षक प्रकाश पदुकोण खूपच निराश दिसले. यानंतर ते म्हणाले होते की, खेळाडूंनी आपली जबाबदारी समजून घेतली पाहिजे.

पॅरिस ऑलिम्पिकमधून परत आल्यानंतर खेळाडूंनी पंतप्रधान नरेंद्र मोदी यांची भेट घेतली. यादरम्यान मनू भाकर, अमन सेहरावत, पीआर श्रीजेश आणि लक्ष्य सेन या खेळाडूंनी त्यांचे अनुभव सांगितले.