CWG Viral Video: पदकवीर भारतात परतले, विमानतळावर जंगी स्वागत

Commonwealth Games 2022: बर्मिंगहॅम कॉमनवेल्थ गेम्स स्पर्धेत चमक दाखवणारे भारतीय खेळाडू आता मायदेशी परतले आहेत. विमानतळावर त्यांचे जंगी स्वागत करण्यात आले. चाहत्यांसह विमानतळावरील कर्मचाऱ्यांनीही टाळ्यांच्या गजरात खेळाडूंचे स्वागत केले.

कॉमनवेल्थ गेम्स २०२२ इंग्लंडमधील बर्मिंगहॅम येथे आयोजित करण्यात आले होते. या स्पर्धेचा समारोप सोमवारी (१२ ऑगस्ट) रात्री उशिरा रंगारंग कार्यक्रमाने झाला. या समारोप समारंभात टेबल टेनिसपटू शरथ कमल आणि महिला बॉक्सर निखत झरीन हे भारतीय संघाचे ध्वजवाहक होते.

स्पोर्ट्स अथॉरिटी ऑफ इंडियाने (SAI) भारतीय खेळाडूंचा भारतात परतल्याचा व्हिडिओ शेअर केला आहे. सर्व खेळाडू वेगवेगळ्या फ्लाइटमधून त्यांच्या ग्रुपसह मायदेशी परतले आहेत.

भारताने २२ सुवर्णांसह ६१ पदके जिंकली

यावेळी राष्ट्रकुल स्पर्धेत भारताने २२ सुवर्णांसह एकूण ६१ पदके जिंकली आहेत. यात १६ रौप्य आणि २३ कांस्य पदकांचाही समावेश आहे. भारत पदकतालिकेत चौथ्या क्रमांकावर राहिला. बर्मिंगहॅम गेम्सच्या शेवटच्या दिवशी सोमवारी (८ ऑगस्ट) भारताने चार सुवर्णांसह एकूण ६ पदके जिंकली. आता पुढील कॉमनवेल्थ गेम्स चार वर्षांनंतर ऑस्ट्रेलियातील व्हिक्टोरिया येथे होणार आहेत.

यावेळच्या राष्ट्रकुल स्पर्धेत भारताने कुस्तीत सर्वाधिक पदके जिंकली आहेत. भारतीय कुस्तीपटूंनी १२ पदके जिंकली, ज्यात ६ सुवर्ण, १ रौप्य आणि ५ कांस्य पदकांचा समावेश आहे. यानंतर वेटलिफ्टिंगमध्ये १० पदके आली. तर बॉक्सिंगमध्येही भारताने तीन सुवर्णांसह ७ पदके जिंकली आहेत.