Ind vs Pak Cricket : वर्ल्डकपआधी भारत-पाकिस्तान तीन सामने होणार, जाणून घ्या
ind vs pak asia cup schedule : यावेळी आशिया चषक एकदिवसीय स्वरूपात खेळवला जाणार असून त्यात भारत, पाकिस्तान, श्रीलंका, अफगाणिस्तान, बांगलादेश आणि नेपाळ सहभागी होणार आहेत.
India vs Pakistan 2023 Asia Cup Matches : भारत-पाकिस्तान क्रिकेट सामन्याची चाहते आतुरतेने वाट पाहत असतात. अशातच आता चाहत्यांसाठी एक आनंदाची बातमी समोर आली आहे. वास्तविक, २०२३ च्या एकदिवसीय विश्वचषकापूर्वी होणाऱ्या आशिया कपमध्ये भारत आणि पाकिस्तानचे (ind vs pak asia cup 2023) संघ तीन वेळा आमनेसामने येऊ शकतात.
विशेष म्हणजे, यावेळी आशिया चषक हायब्रिड मॉडेलमध्ये आयोजत केला जाणार आहे. वास्तविक, 2023 च्या आशिया चषकाचे यजमानपद पाकिस्तानला मिळणार होते, परंतु भारतीय क्रिकेट संघ पाकिस्तानात जायला तयार नाही. त्यामुळे हे मॉडेल आणले आहे. या मॉडेलनुसार आशिया चषक स्पर्धेतील पहिले ४ सामने पाकिस्तानमध्ये आणि उर्वरित ९ सामने श्रीलंकेत खेळवले जातील.
भारत-पाकिस्तान तीन सामने होऊ शकतात
यावेळी आशिया चषक एकदिवसीय स्वरूपात खेळवला जाणार असून त्यात भारत, पाकिस्तान, श्रीलंका, अफगाणिस्तान, बांगलादेश आणि नेपाळ सहभागी होणार आहेत. अ गटात भारत, नेपाळ आणि पाकिस्तानचा समावेश आहे. तर श्रीलंका, बांगलादेश आणि अफगाणिस्तान ब गटात राहतील.
दोन्ही गटातील प्रत्येकी दोन संघ सुपर ४ मध्ये पोहोचतील. त्यानंतर सुपर ४ मध्ये राऊंड रॉबिन पद्धतीने एकूण ६ सामने खेळवले जातील. यानंतर दोन संघ अंतिम फेरीत पोहोचतील आणि त्यांच्यामध्ये विजेतेपदाचा सामना खेळला जाईल. अशाप्रकारे आशिया चषक 2023 मध्ये अंतिम सामन्यासह एकूण १३ सामने खेळवले जातील.
म्हणजेच, भारत-पाकिस्तान यांच्यातील पहिला सामना साखळी फेरीत होईल. यानंतर दुसरा सामना सुपर फोरमध्ये होईल आणि जर भारत-पाकिस्तान फायनलमध्ये पोहोचले तर तेथे आणखी एक सामना होऊ शकतो.
आशिया चषकाचे वेळापत्रक अद्याप जाहीर झालेले नाही
आशिया कप 2023 चे वेळापत्रक अद्याप जाहीर झालेले नाही. मात्र, दोन गोष्टी ठरल्या आहेत, पहिली म्हणजे यावेळी आशिया चषक हा हायब्रीड मॉडेलमध्ये खेळवला जाईल, ज्यामध्ये ४ सामने पाकिस्तानमध्ये आणि ९ सामने श्रीलंकेत खेळवले जातील. दुसरीकडे, ही स्पर्धा ३१ ऑगस्ट ते १९ सप्टेंबर दरम्यान होणार आहे.
संबंधित बातम्या