IND vs ENG: जसप्रीत बुमराहचा नवा रेकॉर्ड, गोलंदाजांच्या खास क्लबमध्ये सामील
भारतीय कर्णधार रोहित शर्माने नाणेफेक जिंकून प्रथम गोलंदाजी करण्याचा निर्णय घेतला. त्याचा हा निर्णय योग्य ठरला. जसप्रीत बुमराह आणि मोहम्मद शमीने आठ षटकांतच अर्धा इंग्लिश संघ पॅव्हेलियनमध्ये पाठवला होता.
भारत आणि इंग्लंड यांच्यातील तीन एकदिवसीय सामन्यांच्या मालिकेतील पहिला सामना लंडनच्या केनिंग्टन ओव्हलवर खेळवला जात आहे. टी-20 मालिका जिंकल्यानंतर आता वनडे मालिकाही जिंकण्यावर टीम इंडियाचे लक्ष विजयाने सुरुवात करायची आहे.
दरम्यान, पहिल्याच वनडे सामन्यात भारताच्या जसप्रीत बुमराहने इंग्लंडची दाणादाण उडवली. जसप्रीत बुमराह आणि मोहम्मद शमीने आठ षटकांत अर्धा इंग्लिश संघ पॅव्हेलियनमध्ये पाठवला. यादरम्यान बुमराहने एक विशेष कामगिरी केली.
बुमराहने सामन्यात अवघ्या १९ धावा देत ६ गडी बाद केले. विशेष म्हणजे त्याने पहिले ४ विकेट हे सुरुवातीच्या ८ षटकांमध्येच घेतले होते.
बुमराह २००२ नंतर वनडेच्या पहिल्या १० षटकात ४ विकेट घेणारा तिसरा भारतीय गोलंदाज ठरला आहे. यापूर्वी २००३ मध्ये जवागल श्रीनाथने जोहान्सबर्गमध्ये श्रीलंकेविरुद्ध अशी कामगिरी केली होती. दहा वर्षांनंतर २०१३ मध्ये भुवनेश्वर कुमारने पोर्ट ऑफ स्पेन येथे श्रीलंकेविरुद्ध सुरुवातीच्या १० षटकांत ४ विकेट घेतल्या होत्या.
तत्पूर्वी, पहिल्या वन-डे सामन्यात भारताचा कर्णधार रोहित शर्माने नाणेफेक जिंकून प्रथम गोलंदाजी करण्याचा निर्णय घेतला आहे. जसप्रीत बुमराहने आपल्या पहिल्याच षटकात दोन विकेट घेत भारताला चांगली सुरुवात करून दिली. जेसन रॉयला क्लीन बोल्ड केल्यानंतर जो रुटही शून्यावर यष्टिरक्षक ऋषभ पंतकडे झेलबाद झाला. इंग्लंडचे तीन फलंदाज खाते न उघडताच पॅव्हेलियनमध्ये परतले. जेसन रॉय आणि जो रूटनंतर बेन स्टोक्सही शून्यावर बाद झाला. मोहम्मद शमीने त्याला ऋषभ पंतकरवी झेलबाद केले.
इंग्लंडकडून कर्णधार जोस बटलरने सर्वाधिक ३० धावा केल्या. त्याने ३२ चेंडूंचा सामना करताना ६ चौकार ठोकले. इंग्लंडचा डाव २५.२ षटकातच ११० धावांवर गारद झाला आहे. भारताकडून बुमराहने ६ तर मोहम्मद शमीने ३ गडी बाद केले.
