Arshad Nadeem Net Worth : सुवर्णपदक जिंकण्यापूर्वी ८० लाख, अर्शद नदीमची नेटवर्थ आता किती? जाणून घ्या

नदीमने ऑलिम्पिकमध्ये ९२.९७ मीटर भालाफेक करून सुवर्णपदक जिंकले. तर मागील ऑलिम्पिक सुवर्णपदक विजेता नीरज चोप्राने रौप्य पदक जिंकले. तेव्हापासून अर्शद सतत चर्चेत आहे.

सुवर्णपदक जिंकल्यानंतर अर्शद नदीमला सतत कोट्यवधी रुपयांची बक्षीसं मिळत आहेत. पण तुम्हाला माहित आहे का की सुवर्णपदक जिंकण्यापूर्वी अर्शद नदीमची एकूण संपत्ती फक्त ८० लाख रुपये होती.

पॅरिस ऑलिम्पिकपूर्वी अर्शद नदीमकडे फक्त एक सुझुकी कार आणि संपत्ती फक्त ८० लाख रुपये होती. मात्र, आता तो प्रचंड श्रीमंत झाला आहे.

अर्शद नदीम याला पॅरिस ऑलिम्पिकमध्ये सुवर्णपदक जिंकण्यासाठी ५० हजार डॉलर्स बक्षीस म्हणून मिळाले होते. भारतीय रुपयात हे अंदाजे ४२ लाख रुपये होतात. तर पाकिस्तानी रुपयात ते १ कोटी ४० लाख रुपये होतात.

याशिवाय पंजाब सरकारने अर्शदला पाकिस्तानी रुपये १० कोटी देण्याची घोषणा केली आहे.

१५ कोटी बक्षिस रक्कम मिळणार

याशिवाय पंजाबचे राज्यपाल सरदार सलीम हैदर खान अर्शद नदीमला २० लाख पाकिस्तानी रुपये वेगळे देणार आहेत. सिंध प्रांताचे मुख्यमंत्री आणि कराचीचे महापौर मिळून अर्शद नदीमला ५ कोटी पाकिस्तानी रुपये आणि सिंधचे राज्यपाल कामरान टेसोरी स्वतंत्रपणे १० लाख रुपये देणार आहेत.

एका मीडिया रिपोर्टमध्ये असा दावा करण्यात आला आहे की, ऑलिम्पिकमध्ये सुवर्णपदक जिंकल्यानंतर अर्शद नदीमला एकूण १५ कोटी ४० लाख रुपयांचे बक्षीस मिळणार आहे. याशिवाय सासरच्यांनी अर्शदला म्हैस दिली असून एका व्यावसायिकाने अल्टो कार दिली आहे.

अर्शद नदीम कोण आहे?

पॅरिस ऑलिम्पिकमध्ये इतिहास रचणाऱ्या अर्शद नदीमचा जन्म पाकिस्तानातील पंजाबमधील मियां चन्नू येथे एका पंजाबी कुटुंबात झाला. त्याला एकूण ८ भाऊ व बहिणी आहेत. अर्शद हा मुस्लिम असून तो पाकिस्तानी पंजाबी आहे. अर्शदने २०१५ पासून भालाफेक स्पर्धांमध्ये भाग घेणे सुरू केले.

फेब्रुवारी २०१६ मध्ये अर्शद नदीमने गुवाहाटी येथे झालेल्या दक्षिण आशियाई क्रीडा स्पर्धेत कांस्यपदक जिंकले होते. अर्शद नदीमला टोकियो ऑलिम्पिकमध्ये पदक जिंकता आले नाही. तो निश्चितपणे अंतिम फेरीत पोहोचला, पण पाचव्या स्थानावर राहिला होता.