Navratri Puja : या शुभ योग-संयोगात शारदीय नवरात्रारंभ! नवरात्रपूजा सुरू करण्यापूर्वी काय करावे?

शारदीय नवरात्रीचा आज पहिला दिवस आहे. धर्मग्रंथात असे म्हटले आहे की ९ दिवस संपूर्ण कुटुंबासह विधीनुसार दुर्गेची पूजा केल्याने धन आणि धान्याची कमतरता भासत नाही आणि देवीचा आशीर्वाद कुटुंबावर कायम राहतो. गुरुवार ३ ऑक्टोबर रोजी घटस्थापनेने नवरात्रोत्सवाची सुरवात होणार आहे. परंपरेनुसार दुर्गा मातेची पूजा केली जाईल. नवरात्रपूजेचे ही काही नियम आहेत, जे पाळणे महत्वाचे आहे. जाणून घेऊया नवरात्रीच्या पहिल्या दिवसाचा पूजेचा मुहूर्त आणि नवरात्रीची पूजा सुरू करण्यापूर्वी काय करावे?

नवरात्र पूजा शुभ मुहूर्त

शारदीय नवरात्र गुरुवार, ३ ऑक्टोबर २०२४ पासून सुरू होत आहे. आश्विन महिन्यातील प्रतिपदा तिथी आणि उदया तिथीनुसार आजपासून शारदीय नवरात्रीला सुरुवात होत आहे. पंचांगानुसार शारदीय नवरात्रीच्या प्रतिपदा तिथीला म्हणजेच पहिल्या दिवशी कलश प्रतिष्ठापनेचा शुभ मुहूर्त ३ ऑक्टोबर रोजी सकाळी ६ वाजून ८ मिनिटे ते सायंकाळी ५ वाजून ३० मिनिटापर्यंत आहे. 

घटस्थापनेचा मुहूर्त - 

गुरुवार ३ ऑक्टोबर २०२४, घटस्थापनेचा पहिला मुहूर्त - सकाळी ०६.१५ ते ०७.२२, अभिजित मुहूर्त - सकाळी ११.४६ ते दुपारी १२.३३. या दोन्ही शुभ मुहूर्तात घटस्थापना आणि कलश प्रतिष्ठापना करणे अत्यंत शुभ ठरेल.

Navratri Devichi Aarti : नवरात्री देवीची संपूर्ण आरती आणि दुर्गे दुर्घट भारी, वाचा

शारदीय नवरात्रपूजा साहित्य

जवस, माती, पाण्याने भरलेला कलश, गंगाजल, तूप, कलावा किंवा लाल धागा (रक्षासूत), वेलची, लवंग, कापूर, कुंकू, सुपारी, अक्षदा, नाणी, पाच अशोकाची किंवा आंब्याची पाने, नारळ, वस्त्र, सिंदूर, फळे व फुले, फुलांच्या माळा आणि सौभाग्याच्या वस्तू, सप्तधान्य, गहू, ज्वारी आणि त्यासाठी मातीचे भांडे व कलश स्थापनेसाठी तांब्या.

नवरात्रपूजा सुरू करण्यापूर्वी काय करावे?

गणपती बाप्पाला प्रथम पुजनीय मानले जाते. तेव्हा नवरात्रीची पूजा सुरू करण्यापूर्वी श्री गणेशाला वंदन करून त्यांचे ध्यान करावे. असे मानले जाते की, कोणतेही शुभ कार्य किंवा पूजा भगवान गणेशाशिवाय सुरू होत नाही. अशा तऱ्हेने नवरात्रपूजा सुरू करण्यापूर्वी गणपतीची पूजा करावी. भगवंताला जल अर्पण करा, चंदन आणि फुले अर्पण करा आणि क्षमाप्रार्थना करा. त्यानंतर मनोभावे नवरात्रीचे घट स्थापन करून देवीची पूजा करा.