Dhanatrayodashi 2024: धनत्रयोदशीला सोने-चांदी खरेदीची परंपरा कशी सुरू झाली? भगवान धन्वंतरींशी आहे संबंध

पंचांगानुसार यावेळी २९ ऑक्टोबर रोजी धनत्रयोदशी साजरी होणार आहे. कार्तिक महिन्यातील शुक्ल पक्षातील त्रयोदशी तिथी २९ ऑक्टोबर रोजी सकाळी १० वाजून ३१ मिनिटांपासून सुरू होईल. त्याच वेळी, ३० ऑक्टोबर रोजी दुपारी ०१ वाजून १५ मिनिटांनी समाप्त होईल. या दिवशी प्रदोष काल संध्याकाळी ०५ वाजून ३८ मिनिटे ते ०८ वाजून १३ मिनिटांपर्यंत आहे. या काळात धनाची देवी लक्ष्मी आणि भगवान धन्वंतरी यांची पूजा करता येते.

या दिवशी सोने आणि चांदी खरेदी करण्याचा शुभ मुहूर्त सकाळी १० वाजून ३१ मिनिटांपासून ते दुसऱ्या दिवशी म्हणजेच ३० ऑक्टोबर रोजी सकाळी ०६ वाजून ३२ मिनिटाांपर्यंत आहे. या काळात खरेदी करणे शुभ मानले जाते.

का केली जाते सोने-चांदीची खरेदी ?

पौराणिक कथेनुसार, समुद्रमंथनाच्या वेळी भगवान धन्वंतरी प्रकट झाले. भगवान धन्वंतरी हे देवांचे वैद्य म्हणूनही ओळखले जातात. भगवान धन्वंतरी प्रकट झाले तेव्हा त्यांच्या हातात कलश होता. त्यामुळे दरवर्षी धनत्रयोदशीच्या मुहूर्तावर चांदीची लक्ष्मी, गणेश, भांडी, दागिन्यांची खरेदी केली जाते. याशिवाय सोने खरेदी करणे देखील शुभ मानले जाते. असे मानले जाते की धन्वंतरीला पितळ धातू आवडतो. यामुळेच या दिवशी पितळ धातूपासून बनवलेल्या वस्तूही खरेदी केल्या जातात.