Anganewadi Jatra 2024: कधी आहे आंगणेवाडीची जत्रा? देवीचा कौल घेऊन निश्चित झाली जत्रेची तारीख!

मालवणमधील मसुरे गावातील आंगणेवाडीतील श्री भराडीदेवीच्या यात्रेला विशेषत: मुंबईतून चाकरमानी मोठ्या संख्येने दाखल होत असतात. सर्वसामान्य लोकांसह विविध पक्षांचे राजकीय नेते देखील या जत्रेत सहभागी होत असतात.

कोकणातील सिंधुदुर्ग जिल्ह्यातील मालवण तालुक्यात असणाऱ्या मसुरे या गावात आंगणेवाडी नावाची वाडी आहे. या वाडीत भराडीदेवी विराजमान आहे. ही देवी भरडावर विराजमान झाली असल्याने या देवीचे नामकरण भराडीदेवी असे झाले आहे. भराड या शब्दाचा अर्थ माळरान असा होतो. या देवीच्या आजूबाजूचा परिसर माळरानाचा असल्यानेच या देवीला भराडीदेवी असे नाव पडले असल्याचे सांगितले जाते.

नवसाला पावणारी भराडीदेवी

खरं म्हणजे आंगणेवाडीतील हे भराडीदेवीचं मंदिर आंगणे कुटुंबीयांचे खासगी मंदिर आहे. तसा फलकही या कुटुंबीयांनी लावला आहे. ही देवी नवसाला पावते अशी या देवीची ख्याती आहे. त्यामुळे हे मंदिर सर्वांसाठी खुले ठेवण्यात आलेले आहे.

हेही वाचा- १२ वर्षांतून एकदा भरतो महाकुंभ मेळा! कशी ठरवली जाते याची तारीख? वाचा..

दरवर्षी सुमारे ५-७ लाख लोक घेतात भराडीदेवीचे दर्शन

दरवर्षी सुमारे ५ ते ७ लाख भाविक भराडीदेवीचे दर्शन घेत असतात. ही जत्रा केवळ दीड दिवसांची असते. आंगणेवाडीच्या भराडीदेवीचा नैवेद्य विशेष असा असतो. कारण हा नैवेद्य आंगणे कुटुंबीयांच्या माहेरवाशीणी अबोल राहून ते तयार करतात. या नैवेद्याचा लाभ प्रत्येक भाविकाला मिळतो हे विशेष.

हेही वाचा- कधी आहे मार्गशीर्ष पौर्णिमा? या दिवशी भगवान विष्णूंना प्रसन्न करण्यासाठी करा हे उपाय!

जत्रेच्या तारखेसाठी घेतला जातो देवीचा कौल 

आंगणेवाडीची जत्रा कोणत्याही तिथीवर अवलंबून नसते. त्यासाठी देवीचा कौल घेतला जातो. याला देवीचा हुकूम असे म्हणतात. दरम्यान, या वर्षी सुमारे १० लाखांहून अधिक भाविक देवीच्या दर्शनासाठी जत्रेला येतील असा अंदाज व्यक्त करण्यात आला आहे.

Disclaimer: या लेखात दिलेली माहिती पूर्णपणे खरी आणि अचूक असल्याचा आमचा दावा नाही. सविस्तर व अधिक माहितीसाठी संबंधित विषयातील तज्ज्ञांचा सल्ला घ्यावा.