Usha Mangeshkar: लतादीदींच्या सुरात सूर मिसळणाऱ्या उषा मंगेशकर! 'जीवन गौरव' पुरस्काराने होणार सन्मान
Usha Mangeshkar: लतादीदींच्या सुरात सूर मिसळणाऱ्या उषा मंगेशकर! 'जीवन गौरव' पुरस्काराने होणार सन्मान
Mar 14, 2024 03:35 PM IST
Usha Mangeshkar Jeevan Gaurav Award 2024: यंदाचा 'झी चित्र गौरव पुरस्कार २०२४' सगळ्यांसाठीच खूप खास असणार आहे. यावर्षी उषाताई मंगेशकर या जीवनगौरव पुरस्काराच्या मानकरी ठरल्या आहेत.
(1 / 4)
यंदाचा 'झी चित्र गौरव पुरस्कार २०२४' सगळ्यांसाठीच खूप खास असणार आहे. यावर्षी उषाताई मंगेशकर या जीवनगौरव पुरस्काराच्या मानकरी ठरल्या आहेत. उषा मंगेशकर यांनी भारतीय संगीत विश्वात बहुमूल्य योगदान दिले आहे. लतादीदींच्या सुरात सूर मिसळून गाणाऱ्या उषा मंगेशकर यांनी संगीत क्षेत्रात स्वतःची ओळख देखील निर्माण केली. उषाताई अवघ्या सहा वर्षांच्या असताना त्यांचे वडील दीनानाथ मंगेशकर यांचे निधन झाले. जणू त्यांच्या विश्वातला स्वरसूर्य मावळला आणि सगळ्या दिशा अंधारून आल्या. त्या लहानग्या वयातच उषा मंगेशकर यांनी ठरवून टाकलं की, आपल्या बहिणींच्या पावलांवर पाऊल टाकत, त्यांच्या सुरांमध्ये सूर मिसळून उभं राहायचं.
(2 / 4)
लतादीदींबरोबर सिनेमाच्या चित्रीकरणाला, रेकॉर्डिंगला जाता जाता रोजच्या रियाजाने उषा मंगेशकर यांचे सूर भक्कम होतच होते. पण, त्यावेळी सुरांबरोबर उषा मंगेशकर यांनी हातात चित्रकलेचा कुंचला देखील धरला. लतादीदी आणि आशाताई संगीत विश्वात सुरांनी रंग भरत होत्या, तर त्याचवेळी उषा मंगेशकर कॅनव्हासवर रंगरेषांचं गाणं चितारत होत्या.
(3 / 4)
जिथे भले भले गायक लतादीदींबरोबर गायला घाबरत होते, तिथे उषा मंगेशकर यांनी हिंमत दाखवली. लतादीदींबरोबर त्यांनी गायलेल्या 'अपलम चपलम' गाण्याने बॉलीवूड चित्रसृष्टीत इतिहास रचला. घरात लतादीदी आणि आशाताई अशा दोन दैवी आवाजांची स्पर्धा असतानासुद्धा त्यांना आपण कधीच स्पर्धा म्हटलं नाही. लतादीदींच्या आशीर्वादाने उषा मंगेशकर यांनी स्वतःचं वेगळेपण सिद्ध करत पार्श्वगायन सुरू केले आणि मग सुरू झालं उषाताई नावाचं पर्व!
(4 / 4)
या पर्वात लक्षवेधी ठरली महाराष्ट्रात धुमाकूळ घालणाऱ्या दादा कोंडके यांच्या सिनेमातील गाणी. राम कदम यांनी संगीतबद्ध केलेल्या अनेक गाण्यांना आपल्या सुरांनी रसिकांच्या ओठांवर खेळवलं. 'मळ्याच्या मळ्यामंदी' आणि 'बोला दाजीबा' ही दोन गाणी ऐकून व्ही. शांताराम यांनी आपल्याला उषा मंगेशकर यांना सिनेमासाठी विचारलं आणि त्यांच्या लोकप्रियतेचा पिंजरा उघडला! उषा मंगेशकर यांनी ठराविक प्रकारच्या गाण्यात स्वतःला बांधून ठेवलं नाही. त्यांच्या 'मुंगडा' या सुपर डुपर हिट गाण्यावर अख्खा देश थिरकला.
(5 / 4)
थिरकायला लावणारी गाणी गाता गाता उषा मंगेशकर यांच्या एका गाण्याने भक्तीसंगीतात एक वेगळा ट्रेण्ड आणला. तो चित्रपट होता १९७५ सालचा जय संतोषी माँ … आणि गाणं होतं, मै तो आरती उतारू रे… सुरांवरच्या प्रभुत्वाबरोबर उषा मंगेशकर यांनी चित्रकलेवरही प्रभुत्व गाजवलं. मराठी बरोबर हिंदी, गुजराती, बंगाली, नेपाळी ,मणिपुरी अशा भाषांमध्ये त्यांनी हजारो गाणी गायली. आज वयाच्या ८८व्या वर्षी उषा मंगेशकर यांनी गायलेली हजारो गाणी, रेखाटलेली अप्रतिम रेखाटनं आणि अद्वितीय कंपोझिशन्स हा खरंतर प्रत्येक भारतीयांसाठी अमूल्य ठेवा आहे.
इतर गॅलरीज