Yuvraj Singh Net Worth : सर्वात श्रीमंत क्रिकेटपटूंच्या यादीत असलेल्या युवराज सिंगची एकूण संपत्ती किती? जाणून घ्या

टीम इंडियाचा सर्वात मोठा मॅचविनर युवराज सिंग याचा आज (१२ डिसेंबर) वाढदिवस आहे. युवराज सिंग हे क्रिकेट विश्वातील एक असे नाव आहे, ज्याला वेगळ्या ओळखीची गरज नाही.  युवीने २०११ च्या वनडे वर्ल्ड कपमध्ये अप्रतिम कामगिरी केली. त्याने फलंदाजीत आणि गोलंदाजीत टीम इंडियासाठी सर्वात मोठे योगदान दिले.

विशेष म्हणजे, युवीने देशासाठी जीवाची पर्वा न करता कॅन्सरशी लढा देत हा संपूर्ण वर्ल्डकप खेळला. याआधी त्याने २००७ चा टी-20 वर्ल्डकपदेखीलग गाजवला होता. त्याने त्या वर्ल्डकपमध्ये इंग्लंडच्या स्टुअर्ट ब्रॉड याला सलग ६ षटकार ठोकले होते.

टी-20 वर्ल्डकप २००७ आणि वनडे वर्ल्डकप २०११ च्या विजेत्या टीमचा हिरो युवराज सिंग आज त्याचा ४३ वर्षांचा झाला आहे. या निमित्ताने आपण युवराज सिंगची एकूण संपत्ती किती आहे, हे जाणून घेणार आहोत.

युवराज सिंगची एकूण संपत्ती किती आहे?- युवराज सिंगने क्रिकेटच्या मैदानावर आपल्या दमदार कामगिरीमुळे खूप नाव आणि संपत्ती कमावली. त्याने अनेक प्रसिद्ध ब्रँडसोबत काम केले आहे आणि अनेक जाहिरातींमधूनही पैसा कमावतो.  क्रिकेट जगतातील सर्वात श्रीमंत खेळाडूंच्या यादीत युवराज सिंगचा समावेश आहे. त्याची एकूण संपत्ती ३२० कोटी रुपये आहे.

युवराज सिंगचा जन्म चंदीगडमधील पंजाबी कुटुंबात १२ डिसेंबर १९८१ रोजी झाला. युवी २००३  ते २०१७ या काळात टीम इंडियासाठी क्रिकेटच्या तिन्ही फॉरमॅटमध्ये खेळला. या काळात, तो ब्रँड एंडोर्समेंटमध्ये देखील अव्वल खेळाडू होता. युवराजने पेप्सी, बिर्ला सन लाइफ, रिबॉक, प्यूमा, कॅडबरी, व्हरपूल, रॉयल मेगा स्टॅग यासह अनेक ब्रँडसाठी काम केले आहे आणि अजूनही काम करत आहे.

ब्रँड एंडोर्समेंट हा युवराज सिंगच्या उत्पन्नाचा मुख्य स्त्रोत - जाहिरातींव्यतिरिक्त युवराजने अनेक पंजाबी चित्रपटांमध्ये काम केले आणि भरपूर कमाई केली. त्याच वेळी त्याने अनेक नवीन स्टर्ट कंपन्यांमध्ये गुंतवणूक केली. त्याच्या उत्पन्नाचा मुख्य स्त्रोत ब्रँड एंडोर्समेंट आहे. २०२४ च्या T20 विश्वचषकासाठी त्याची ब्रँड ॲम्बेसेडर म्हणून निवड करण्यात आली होती.

रिपोर्ट्सनुसार, युवराज त्याच्या ब्रँड एंडोर्समेंटमधून दर महिन्याला सुमारे १ कोटी रुपये कमावतो. याशिवाय, तो अनेक फिटनेस सेंटर्स आणि स्पोर्ट्स सेंटरशी संबंधित आहे, तिथूनही तो भरपूर कमाई करतो.

युवराज अनेक आलीशान घरांचा मालक- युवराज सिंगकडे मुंबईतील दोन आलिशान अपार्टमेंटसह अनेक आलिशान मालमत्ता आहेत. २०१३ मध्ये, त्याने वरळीतील लक्झरी रेसिडेन्शिअल टॉवर ओंकार १९७३ मध्ये दोन अपार्टमेंट खरेदी केले, ज्यासाठी त्याने ६४ कोटी रुपये खर्च केले. याशिवाय चंदीगडमध्ये त्याचा एक दोन मजली वाडाही आहे. यानंतर गोव्यातही त्याचे घर असून ते मोरजीमच्या टेकडीवर वसलेले आहे.

युवराजला महागड्या गाड्यांची आवड- युवीच्या कार कलेक्शनमध्ये तुम्हाला अनेक गाड्या पाहायला मिळतील. माहितीनुसार, त्याच्या गाड्यांच्या कलेक्शनमध्ये BMW M5 E60, BMW X6M, Audi Q5, Lombigny Murcielago, Bentley Continental GT सारख्या अनेक महागड्या गाड्यांचा समावेश आहे.