Yeh Jawaani Hai Deewani : रणबीर-दीपिकाचा चित्रपट पुन्हा करणार कोट्यवधींची कमाई! पहिल्या दिवशीचे आकडे पाहिलेत?

रणबीर कपूर आणि दीपिका पदुकोण यांचा गाजलेला चित्रपट 'ये जवानी है दिवानी' आज म्हणजेच ३ जानेवारीला पुन्हा प्रेक्षकांच्या भेटीला येणार आहे. हा चित्रपट ४६ शहरांतील १४० चित्रपटगृहांमध्ये प्रदर्शित होणार आहे. केवळ भारतातच नाही तर, ब्रिटनमध्येही हा चित्रपट पुन्हा प्रदर्शित होणार आहे.

अलीकडे कल्ट चित्रपटांचे पुनर्प्रदर्शन हा ट्रेंड वाढला आहे. नुकतेच 'तुंबाड', 'करण अर्जुन', 'रॉकस्टार', 'लैला मजनू', 'कल हो ना हो', 'रहना है तेरे दिल में' यांसारखे सिनेमे पुन्हा थिएटरमध्ये प्रदर्शित झाले आहेत.

पिंकविलाने दिलेल्या वृत्तानुसार 'ये जवानी है दिवानी' या चित्रपटाने आगाऊ बुकिंगमध्ये पहिल्याच दिवशी सुमारे २५,००० तिकिटे विकली आहेत. पहिल्या दिवसाच्या कलेक्शनबद्दल बोलायचे झाले, तर हा चित्रपट पहिल्याच दिवशी ३ कोटींची कमाई करू शकतो. या आकड्यांवरून ही लक्षात येते की, प्रेक्षक अजूनही या चित्रपटाचे दिवाने आहेत. गेल्या वर्षी 'कल हो ना हो' हा चित्रपट पुन्हा चित्रपटगृहात प्रदर्शित झाला होता, तेव्हा या चित्रपटाने ७७ लाखांची कमाई केली होती.

सॅकनिल्कच्या आकडेवारीनुसार, या चित्रपटाने १९ कोटींची मोठी ओपनिंग केली होती. ७५ कोटी रुपयांच्या बजेटमध्ये बनलेल्या ब्लॉकबस्टर चित्रपटाने जगभरात ३१८ कोटी रुपयांची कमाई केली होती, तर भारतात १८८.५७ कोटी रुपयांची कमाई केली होती.

'ये जवानी है दिवानी' हा एक रोमँटिक कॉमेडी-ड्रामा आहे, ज्याने प्रचंड लोकप्रियता मिळवली होती. अयान मुखर्जी दिग्दर्शित या चित्रपटात रणबीर कपूर, दीपिका पदुकोण, कल्की कोचलिन आणि आदित्य रॉय कपूर यांच्या प्रमुख भूमिका होत्या. अविस्मरणीय अभिनय, आकर्षक कथानक आणि 'बद्तमीज दिल', 'बलम पिचकारी', 'सुभानल्लाह', 'कबीरा', 'इलाही' आणि 'दिल्लीवाली गर्लफ्रेंड' या गाण्यांमुळे हा चित्रपट आजही चाहत्यांच्या आवडीचा आहे.