पुण्यात एकता नगर परिसरात पुन्हा पुर ! बचावकार्य सुरू; नागरिकांना सुरक्षितस्थळी हलवा; मुख्यमंत्र्यांचे आदेश

भारतीय हवामान खात्याने दिलेल्या इशाऱ्यानुसार पुणे आणि जिल्हा परिसरात आज जोराचा पाऊस होत असून या पार्श्वभूमीवर संपूर्ण प्रशासनाने सज्ज राहावे. नदी आणि धरण परिसरातील संभाव्य धोकादायक क्षेत्रातील नागरिकांना सुरक्षितस्थळी हलविण्यात यावे. आवश्यकता वाटल्यास एनडीआरएफ, एसडीआरएफ आणि सेनादलाची मदत घेण्यात यावी. लोकांचे स्थलांतर केल्यास त्यांच्यासाठी निवारा, कपडे, जेवण इत्यादी सर्व व्यवस्था करण्यात यावी, अशा सूचना मुख्यमंत्री एकनाथ शिंदे यांनी पुणे महापालिका आयुक्त आणि पुणे जिल्हाधिकारी यांना दूरध्वनीद्वारे दिल्या आहेत.

पुणेकरांची चिंता वाढली आहे. खडकवासला धरणातून विसर्ग वाढवल्याने  सिंहगड रस्त्यावरील निंबज नगर, एकता नगरमध्ये पुन्हा  पाणी भरले आहे. सध्या प्रशासन अलर्ट मोडवर असून लष्कर तैनात करण्यात आले आहे. मुख्यमंत्री एकनाथ शिंदे यांनी दक्ष राहण्याच्या सूचना केल्या असून नागरिकांना सुरक्षित स्थळी नेल्यास संगितले आहे. 

या ठिकाणी एनडीआरएफ, अग्निशामक दल आणि लष्कराच्या तुकड्या तैनात करण्यात आल्या आहेत. नागरिकांना सतर्क राहण्याच्या सूचना देण्यात आल्या आहेत. प्रशासन लाऊडस्पीकरवरून सूचना देत आहेत. 

पुणे परिसरातील खडकवासला, मुळशी, पवना इत्यादी धरणातून पाण्याचा विसर्ग सुरू करण्यात आला आहे. त्या पार्श्वभूमीवर या धरण आणि नदी परिसरातील पूररेषेच्या आतील आणि संभाव्य धोका क्षेत्रातील नागरिकांचे सुरक्षितस्थळी स्थलांतर करण्यात यावे. या विसर्गामुळे पुणे आणि पिंपरी-चिंचवड परिसरातील बाधित होऊ शकणाऱ्या एकतानगर, दत्तवाडी, पाटील इस्टेट, येरवडा परिसर, शिवाजी नगर कोर्ट परिसर, कामगार पुतळा, हॅरीस ब्रीज, दापोडी, जुनी सांगवी, कासारवाडी, पिंपरी कॅम्प , रावेत, बालेवाडी गावठाण, ज्युपीटर हॉस्पिटल परिसर, कपिल मल्हार परिसर,  बाणेर, बावधन, संगमवाडी इत्यादी सखल भागातील लोकांच्या सुरक्षिततेसाठी आवश्यक उपाययोजना करण्यात याव्यात, अशा सूचना मुख्यमंत्री एकनाथ  शिंदे यांनी दिल्या आहेत.

संपूर्ण प्रशासनाने या काळात अलर्ट राहावे. लोकांचे सुरक्षितस्थळी स्थलांतर करणे, निवारा केंद्रांमध्ये त्यांच्यासाठी सर्व सुविधांची उपलब्धता करून देणे यासाठी सर्व प्रशासनाने समन्वयाने काम करावे. हवामान खात्याकडून येणाऱ्या विविध सूचनांची दखल घेऊन त्याची लोकांना त्वरित माहिती देण्यात यावी. सर्वांनी सतर्क राहून लोकांना कोणत्याही प्रकारच्या अडचणी निर्माण होणार नाहीत याची दक्षता घ्यावी, अशा सूचना मुख्यमंत्री शिंदे यांनी दिल्या आहेत.

खडकवासला धरण साखळी क्षेत्रात पाऊस पडत असल्याने धरण भरू लागली आहेत. धरण साखळी क्षेत्रात पाऊस पडत असल्याने धरणातून विसर्ग करण्याच्या सूचना अजित पवारांनी दिल्या आहे. 

पाणी सोडताना नागरिकांना सूचित करावे  असे देखील अजित पवारांनी सांगितले आहे. खडकवासला धरण हे ६५ टक्केपर्यंत खाली केलं तर रात्री पाऊस पडला तर धरणात पाणी राहील असे अजित पवारांनी सूचना दिल्या आहेत.

पुण्यात मुसळधार पाऊस सुरू असल्याने, सखल भागात येणाऱ्या पुराचा सामना करण्यासाठी एकता नगर येथे लष्करी तुकडीला तैनात करण्यात आले आहे. दक्षिण मुख्यालय,  बॉम्बे इंजिनिअर्स ग्रुप (#BEG) मधील इंजिनियर टास्क फोर्स आणि MH खडकी येथील वैद्यकीय कर्मचाऱ्यांसह १००  हून अधिक जवानांना या ठिकाणी  बचाव नौका, क्वाडकॉप्टर आणि इतर आवश्यक उपकरणांसह तैनात करण्यात आले आहे.