UPI payment limit : यूपीआयद्वारे आता ५ लाख रुपयांपर्यंत व्यवहार करता येणार, पण…
UPI payment limit : यूपीआयद्वारे आता ५ लाख रुपयांपर्यंत व्यवहार करता येणार, पण…
Dec 08, 2023 03:16 PM IST
RBI on UPI Payment Limit : यूपीआयच्या माध्यमातून होणाऱ्या व्यवहारांच्या नियमात रिझर्व्ह बँकेनं बदल केले आहेत. त्यानुसार यापुढं यूपीआयद्वारे ५ लाखांपर्यंतचे व्यवहार करता येणार आहेत. पतधोरण विषयक बैठकीनंतर पत्रकारांशी बोलताना आरबीआयचे गव्हर्नर शक्तिकांत दास यांनी ही माहिती दिली.
(1 / 6)
आरबीआयच्या नव्या निर्णयानुसार, यूपीआयच्या माध्यमातून यापुढं ५ लाख रुपयांपर्यंतचे पेमेंट करता येणार आहे. मात्र, ही मुभा फक्त शैक्षणिक संस्था किंवा आरोग्य सेवा संस्थांशी (रुग्णालये, नर्सिंग होम) व्यवहार करतानाच असेल. आरबीआयच्या पतधोरण समितीच्या बैठकीत या संदर्भातील प्रस्ताव मंजूर करण्यात आला आहे.
(2 / 6)
गेल्या काही वर्षांत देशात यूपीआय पेमेंटचं प्रमाण झपाट्यानं वाढलं आहे. स्मार्ट फोनचा वापर आणि केंद्र सरकारच्या डिजिटल इंडिया मोहिमेमुळं जवळपास सर्वच ठिकाणी यूपीआयद्वारे देयके स्वीकारली जातात. शॉपिंग मॉल, मच्छी मार्केट किंवा किराणा दुकान अशा सर्वच ठिकाणी यूपीआयच्या माध्यमातून पैशांचा व्यवहार होतो. आतापर्यंत यूपीआयद्वारे दिवसाला जास्तीत जास्त १ लाख रुपयांपर्यंत व्यवहार करता येत होता. आता मर्यादित स्वरूपात का होईना, त्यात बदल करण्यात आला आहे.
(3 / 6)
यूपीआय व्यवहार अधिक सुलभ व्हावे म्हणून नॅशनल पेमेंट कॉर्पोरेशन ऑफ इंडियानं याआधीच महत्त्वाची सेवा सुरू केली आहे. आवाजाच्या माध्यमातून यूपीआय पेमेंट करण्यासाठी फीचर लाँच करण्यात आलं आहे. या नव्या फीचरमुळं युजर कृत्रिम बुद्धिमत्तेवर चालणाऱ्या प्रणालीद्वारे सुरक्षितपणे पैशांचे व्यवहार करू शकतील.
(4 / 6)
सुरुवातीला यूपीआयद्वारे हिंदी किंवा इंग्रजीमध्ये 'व्हॉइस कमांड' देऊन पैसे पाठवता येणार आहेत. कालांतरानं हे फीचर प्रादेशिक भाषांमध्ये उपलब्ध होईल. मग मराठीत बोलूनही पैशांचे व्यवहार होऊ शकणार आहेत.
(5 / 6)
काही दिवसांपूर्वी रिझर्व्ह बँकेनं UPI Lite युजर्सची व्यवहार मर्यादा २०० रुपयांवरून ५०० रुपये केली होती. पिन नंबर शिवाय हा व्यवहार करता येतो. UPI द्वारे व्यवहार करणारा प्रत्येकजण UPI Lite वापरू शकतो.
(6 / 6)
नियर फील्ड कम्युनिकेशन (NFC) तंत्रज्ञानाचा वापर करून इंटरनेट न वापरता डिजिटल व्यवहार ऑफलाइन करता येतात. UPI-Lite चा वापर वाढवण्यासाठी आरबीआय NFC तंत्रज्ञानाचा वापर करणार आहे. या तंत्रज्ञानामुळं इंटरनेट कमकुवत असलेल्या किंवा अजिबात इंटरनेट कनेक्शन नसलेल्या ग्राहकांना देखील डिजिटल व्यवहार करता येणार आहे.
इतर गॅलरीज