‘आता देवीचा फोटो असणारा केक कापणार का?’; ‘सातव्या मुलीची सातवी मुलगी’च्या कलाकारांवर भडकले चाहते!

‘सातव्या मुलीची सातवी मुलगी’ ही मालिका सध्या छोट्या पडद्यावर चांगलीच गाजत आहे. या मालिकेने नुकताच ५०० भागांचा टप्पा पूर्ण केला. या निमित्ताने मालिकेच्या सेटवर मोठा जल्लोष करण्यात आला. याचे फोटो कलाकारांनी नुकतेच सोशल मीडियावर शेअर केले आहेत. मात्र, यावर आता चाहते संतापले आहेत.

‘सातव्या मुलीची सातवी मुलगी’ या मालिकेचे ५०० भाग पूर्ण झाल्याच्या आनंदात सेटवर दोन मोठे केक आणण्यात आले होते. हे केक कापून कलाकारांनी सेलिब्रेशन केले. यावेळी त्यांचे फोटो पाहून चाहते चिडले. याला कारणीभूत केकवरील फोटो ठरले आहेत.

यातील एका फोटोवर मालिकेचं पोस्टर प्रिंट करण्यात आलं आहे. या पोस्टरवर नेत्रासोबत त्रिनयना देवीचा फोटो देखील आहे. त्यामुळे आता हा केक कापणार म्हणजे त्यावरील देवीचा फोटो देखील कापणार का? असा प्रश्न संतप्त चाहते विचारात आहेत.

या सेलिब्रेशनच्या केकवर त्रिनयना देवीचा फोटो दिसताच एका युजरने कमेंट करत म्हटलं की, ‘देवीचा फोटो असलेला केक कापणार का?’ यावर आता झी मराठी वाहिनीने देखील प्रतिक्रिया दिली आहे.

चाहत्यांच्या या कमेंटवर उत्तर देताना ‘झी मराठी’ वाहिनीकडून स्पष्टीकरण देत सांगण्यात आलं की, ‘केकचा तो भाग बाजूला काढून ठेवला होता. त्रिनयना देवी या मालिकेचा मूळ गाभा आहे. हे रहस्य तिने योजलेलं आहे. त्यामुळे सगळ्या क्रिएटीव्हवर तिची प्रतिमा असतेच.’

मात्र, वाहिनीच्या या उत्तरानंतर देखील चाहत्यांचे समाधान झालेले नाही. अनेकांनी यावर कमेंट करता टीका केली आहे. अनेक चाहते यावर व्यक्त होताना दिसत आहेत.