Photos : मुंबईत वर्दळीच्या ठिकाणी रस्ता खचल्याची घटना; १५ फूट खड्ड्यात कारचे चाक फसले

मुंबईत प्रभादेवी येथीव सिद्धिविनायक मंदिर परिसरात रस्ता खचल्याची घटना आज घडली आहे. रस्त्याच्या मधोमध तब्बल १५ फूट खोल खड्डा पडल्याचे दिसून आले आहे. खचलेल्या रस्त्याच्या खड्ड्यात कारचे चाक फसल्याने हमरस्त्यावर वाहतूक कोंडी झाली होती.

प्रभादेवी येथे रस्त्या खचल्याची माहिती समजताच मुंबई महानगरपालिकेचे कर्मचारी घटनास्थळावर दाखल झाले होते. खचलेल्या रस्त्याचा भागाच्या आजूबाजूला कठडे उभारून सुरक्षित अंतरावरून वाहतूक वळवण्यात आली होती. महापालिकेकडून जेसीबी यंत्र मागवून खचलेल्या रस्त्यावर पडलेल्या खड्ड्यातून माती उपसण्यात आली.

दरम्यान, मुंबई शहरात हमरस्त्यावर रस्ता खचल्याने पालिका प्रशासनावर टीका करण्यात येत आहे. यापूर्वी देखील अशाप्रकारे रस्ता खचण्याची घटना घडली होती. अनेक ठिकाणी पाण्याची लाइनमध्ये गळती आहे. पालिका प्रशासनाकडून दुरूस्तीचे काम केले जात नसल्याचा आरोप मनसेचे माजी नगरसेवक संतोष धुरी यांनी केला आहे.

सध्या मुंबईत गणपती उत्सवाची मोठी धामधुम आहे. गणपती विसर्जन मिरवणुका या रस्त्यावरून नेहमी जात येत असतात. अशावेळी मोठी दुर्घटना टळल्याची भावना नागरिकांकडून व्यक्त करण्यात येत आहे.