MTHL : मुंबई, ठाणे, नवी मुंबईसाठी गेमचेंजर ठरू शकणारा अटल सेतू आहे कसा? पाहा फोटो
MTHL : मुंबई, ठाणे, नवी मुंबईसाठी गेमचेंजर ठरू शकणारा अटल सेतू आहे कसा? पाहा फोटो
Jan 11, 2024 07:02 PM IST
Mumbai Trans Harbour Link : देशातील सर्वात लांब सागरी पूल असलेल्या मुंबई ट्रान्स हार्बर लिंकचे (अटल सेतू) पंतप्रधान नरेंद्र मोदी यांच्या हस्ते १२ जानेवारी रोजी उद्घाटन होणार आहे. हा पूल नेमका आहे कसा आणि त्याचा कसा आणि किती फायदा होऊ शकतो? जाणून घेऊया…
(1 / 7)
देशातील सर्वात लांब सागरी पूल असलेल्या मुंबई ट्रान्स हार्बर लिंकचं (अटल सेतू) लोकार्पण पंतप्रधान नरेंद्र मोदी यांच्या हस्ते १२ जानेवारी रोजी होणार आहे. हा सहा पदरी पूल एकूण २२ किमी लांब असून त्यापैकी १६.५ किमी अंतर समुद्रातून कापणार आहे. मुंबईच्या रिअल इस्टेट क्षेत्रासाठी हा सेतू क्रांतिकारी ठरणार आहे.
(2 / 7)
एमटीएचएल तथा अटल सेतूमुळे मुंबई ते नवी मुंबई दरम्यानचा दोन तासांचा प्रवास केवळ २० मिनिटांत करता येणार आहे. एमटीएचएलमुळे रिअल इस्टेट हब म्हणून मुंबईचा महत्त्व आणखी वाढणार आहे. या सेतूमुळं मुंबईतील मालमत्तांच्या किंमती वाढतील आणि रिअल इस्टेट क्षेत्राला मोठी चालना मिळेल, अशी अपेक्षा आहे.
(3 / 7)
माजी पंतप्रधान अटलबिहारी वाजपेयी यांच्या नावानं ओळखला जाणारा एमटीएचएल मुंबईतील शिवडी इथून सुरू होतो आणि रायगड जिल्ह्यातील उरण तालुक्यातील न्हावा शेवा इथं संपतो. या पुलासाठी तब्बल १८ हजार कोटी रुपये खर्च आला आहे.या पुलामुळं मुंबईकरांची वाहतूक कोंडीतून सुटका होणार आहे.
(4 / 7)
मुंबई महानगर प्रदेशासाठी मुंबई ट्रान्स हार्बर लिंक (MTHL) हा सागरी सेतू अत्यंत महत्त्वाचा आहे. कारण, या पुलामुळं मुंबई-गोवा महामार्ग, वसई, विरार आणि नवी मुंबई या शहरांसह रायगड जिल्हा देखील जोडला जाणार आहे. २०१८ साली या पुलाच्या कामाला सुरुवात झाली. हा पूल साडेचार वर्षांत पूर्ण होणे अपेक्षित होते. मात्र, कोविड महामारामुळं हा पूल पूर्ण होण्यास आठ महिने उशीर झाला.
(5 / 7)
अटल सेतू पुलावर चारचाकी वाहनांसाठी कमाल वेग मर्यादा १०० किमी प्रतितास असेल. पुलावर चढताना आणि उतरताना वेग ४० किमी प्रतितास इतका ठेवावा लागेल. दुचाकी आणि तीनचाकी वाहनांना या सेतूवरून प्रवास करता येणार नाही.
(6 / 7)
मुंबई ट्रान्स हार्बर लिंक हा गेमचेंजर ठरेल असा विश्वास नाहर ग्रुपच्या उपाध्यक्ष व नरेडको महाराष्ट्रच्या वरिष्ठ उपाध्यक्ष मंजू याज्ञिक यांनी व्यक्त केला. हा अभियांत्रिकी चमत्कार कनेक्टिव्हिटी आणि रिअल इस्टेट क्षेत्राचे चित्रच बदलून टाकू शकतो. मुंबई ते नवी मुंबई प्रवासाचा वेळ २० मिनिटांवर येणार असल्यानं पनवेल आणि उलवेसारख्या भागाचा प्रचंड विकास होणार आहे. परवडणाऱ्या व मोठ्या घरांच्या मागणीत वाढ होईल, असं याज्ञिक म्हणाल्या.
(7 / 7)
एमटीएचएल सागरी पूल ज्या परिसरातून जातो, तिथल्या मालमत्तांच्या किंमती वाढणार आहे. या मालमत्ता मुंबईतील प्रमुख भागांत आहेत. तिथल्या निवासी व व्यावसायिक मालमत्तांची मागणी वाढेल, असं श्रीकृष्ण समूहाचे व्यवस्थापकीय संचालक संदीप जगसिया यांनी सांगितलं. (डिस्क्लेमर: या लेखातील तज्ज्ञांची मते त्यांची स्वत:ची आहेत. हिंदुस्तान टाइम्स मराठी त्याच्याशी सहमत असेलच असं नाही.)
इतर गॅलरीज