OTT Releases : व्हॅलेंटाईन वीक अन् मनोरंजनाची मेजवानी! पाहा या आठवड्याच्या ओटीटी रिलीजची यादी

फेब्रुवारीचा पहिला आठवडा उलटून गेला आहे. पहिल्याच आठवड्यात अनेक उत्तम चित्रपट थिएटर आणि ओटीटी प्लॅटफॉर्मवर दाखल झाले आहेत. अशा परिस्थितीत, दुसरा आठवडाही धमाकेदार असणार आहे. व्हॅलेंटाईन वीकमध्ये ओटीटीवर रोमान्स, थ्रिलर, गुन्हेगारी आणि अ‍ॅक्शनने भरलेल्या अनेक नवीन सीरिज आणि चित्रपट प्रदर्शित होणार आहेत. चला जाणून घेऊया १० फेब्रुवारी ते १६ फेब्रुवारी २०२५ दरम्यान प्रदर्शित होणाऱ्या चित्रपट आणि सीरिजबद्दल…

'सर्व्हायव्हिंग ब्लॅक हॉक डाउन' ही माहितीपट मालिका आज म्हणजेच १० फेब्रुवारी रोजी नेटफ्लिक्सवर प्रदर्शित होत आहे. ही मालिका १९९३ मध्ये सोमालिया आणि अमेरिका यांच्यातील मोगादिशूच्या लढाईची कहाणी सांगणारी आहे. या लढाईत, सोमाली मलिशियाने दोन ब्लॅक हॉक हेलिकॉप्टर पाडले होते. या माहितीपटात या लढाईत सहभागी झालेल्या लोकांचे अनुभव दाखवले आहेत. ही माहितीपट मालिका जॅक मॅकइन्स यांनी दिग्दर्शित केली आहे.

कावेरी कपूर 'बॉबी और ऋषी की लव्ह स्टोरी' या चित्रपटातून बॉलिवूडमध्ये पदार्पण करण्यास सज्ज झाली आहे. या चित्रपटात वर्धन पुरी याने ऋषीची भूमिका साकारली आहे. 'बॉबी और ऋषी की लव्ह स्टोरी' ११ फेब्रुवारी रोजी ऑनलाईन प्रदर्शित होणार आहे. हा चित्रपट तुम्ही डिस्ने+हॉटस्टारवर पाहू शकता.

रवी मोहन आणि नित्या मेनन यांचा 'कधलिक्का नेरमिल्लई' हा चित्रपट ११ फेब्रुवारी रोजी नेटफ्लिक्सवर प्रदर्शित होत आहे. त्याचा ट्रेलर लोकांना खूप आवडला आहे.

अभिनेत्री सोलंकी रॉय २०० वर्ष जुन्या श्रद्धा आणि रहस्यांचा शोध घेणाऱ्या 'बिशोहोरी' या नवीन बंगाली वेब सीरिजमध्ये दिसणार आहे. सोलंकी रॉय आणि रोहन भट्टाचार्य यांची मुख्य भूमिका असलेली ही बंगाली वेब सीरिज १३ फेब्रुवारी रोजी होईचोईवर प्रसारित होत आहे.

'कोब्रा काई'चे आतापर्यंतचे सर्व सीझन लोकांना खूप आवडले आहेत. आता 'कोब्रा काई' सीझन ६ भाग ३ देखील येणार आहे. कोब्रा काई जिवंत आहे आणि हा त्याचा शेवटचा सीझन असणार आहे. अंतिम विजेतेपदाच्या लढाईत, डॅनियल, जॉनी आणि संघ सेकाई तैकाईला संपवण्याची शेवटची संधी मिळवण्यासाठी सर्वकाही धोक्यात घालणार आहे. ही सीरिज १३ फेब्रुवारी रोजी नेटफ्लिक्सवर येत आहे.

यामी गौतम-धर आणि प्रतीक गांधी यांचा आगामी चित्रपट 'धूम धाम' १४ फेब्रुवारी रोजी नेटफ्लिक्सवर प्रदर्शित होत आहे. 'धूम धाम' हा चित्रपट नवविवाहित जोडपं कोयल आणि वीरची कहाणी सांगणारा आहे. त्यांच्या आयुष्यात लग्नाच्या पहिल्याच रात्री एक रोमांचक वळण येते, जेव्हा गुंड त्यांच्या खोलीत घुसतात आणि त्यांचा पाठलाग करू लागतात.

'मार्को' हा एक मल्याळम चित्रपट आहे. ही एका गुंडाची कथा आहे, जो आपल्या भावाच्या हत्येचा बदला घेण्यासाठी धोकादायक मार्ग निवडतो. या चित्रपटात मार्कोची भूमिका उन्नी मुकुंदन यांनी साकारली होती. हा चित्रपट १४ फेब्रुवारी रोजी सोनी लिव्हवर प्रसारित होत आहे.

कोरियन भाषेत बनवलेल्या या मालिकेचे नाव 'मेलो मूव्ही' आहे. ही एक ड्रामा सीरिज आहे, ज्याचे एकूण १० भाग असणार आहेत. ही सीरिज १४ फेब्रुवारी रोजी नेटफ्लिक्सवर येत आहे.

'प्यार टेस्टिंग' ही एक रोमँटिक कॉमेडी सीरिज आहे, जी १४ फेब्रुवारी रोजी 'ZEE5'वर प्रदर्शित होत आहे. ही सीरिज राजस्थानच्या पार्श्वभूमीवर आधारित आहे. या सीरिजमध्ये सत्यजीत दुबे आणि प्लाबिता बोरठाकूर यांनी मुख्य भूमिका साकारल्या आहेत.