अभिनेत्री स्वरा भास्करच्या पतीसोबत होणार नवाब मलिकांच्या मुलीची फाइट. कोण आहेत NCP-शरद पवार पक्षाचे उमेदवार फहाद अहमद?

राष्ट्रवादी कॉंग्रेस (शरद पवार) पक्षाकडून मुंबईतील अणुशक्ती नगर विधानसभा मतदारसंघातून फहाद अहमद यांना उमेदवारी जाहीर करण्यात आली आहे. तर राष्ट्रवादी कॉंग्रेस (अजित पवार) गटाकडून माजी मंत्री नवाब मलिक यांची मुलगी सना मलिक यांना उमेदवारी देण्यात आली आहे. राष्ट्रवादीत प्रवेश करण्यापूर्वी फहाद अहमद हे पूर्वी समाजवादी पार्टीच्या युवकांच्या संघटनेचे महाराष्ट्राचे प्रमुख होते. सिने अभिनेत्री स्वरा भास्कर हिच्यासोबत गेल्या वर्षी फेब्रुवारी महिन्यात त्यांनी लग्न केल्यानंतर ते चर्चेत आले होते. शिवाय मुंबईत सीएए एनआरसीविरोधात भव्य मोर्चे आयोजित करण्यात त्यांनी सक्रिय सहभाग घेतला होता.

पती फहाद अहमदला राष्ट्रवादी कॉंग्रेसचे तिकीट जाहीर झाल्यानंतर अभिनेत्री स्वरा भास्कर हिने ट्विट करत शरद पवार, सुप्रिया सुळे, अखिलेश यादव यांना टॅग करत ट्विट करून सर्वांचे आभार मानले होते. फहाद अहमद हे अणुशक्ती नगरमध्ये राहत असून या भागात त्यांचा चांगला जनसंपर्क आहे. 

राष्ट्रवादी कॉंग्रेसचे आमदार नवाब मलिक यांना चार मुले आहेत. सना ही तिसऱ्या क्रमांकाची मुलगी असून तिने आर्किटेक्चर विषयाचे शिक्षण घेतले आहे. शिवाय एलएलबीचे शिक्षण घेतले आहे. सना या अजित पवारांच्या राष्ट्रवादी कॉंग्रेसच्या प्रवक्त्या आहेत. राज्यात महायुतीत सत्तेत सामील असलेला राष्ट्रवादी- अजित पवार गट आमदार नवाब मलिक यांना अणुशक्ती नगरमधून पुन्हा तिकीट देण्यास इच्छुक होता. मात्र भाजपने मलिकांच्या उमेदवारीला विरोध केला होता. त्यामुळे नवाब मलिक यांची मुलगी सना ही निवडणूक लढवतेय. नुकत्याच झालेल्या लोकसभा निवडणुकीत या मतदारसंघात महाविकास आघाडीचे उमेदवार अनिल देसाई यांना २९ हजार मतांनी आघाडी घेतली होती.

मुंबईतील अणुशक्ती नगर, शिवाजीनगर, गोवंडी, मानखुर्द या भागात मुस्लिमांची मतदारांची मोठी संख्या आहे. या मतदारसंघातून राष्ट्रवादी कॉंग्रेसचे नवाब मलिक २००९ आणि २०१९ असे दोनदा निवडणूक जिंकले आहे. फहाद हे समाजवादी पार्टीत सक्रिय आहेत. दिल्लीतील जेएनयूमधील डाव्या विद्यार्थी संघटनांच्या चळवळीतून पुढे आलेल्या अभिनेत्री स्वरा भास्कर या भाजपविरोधी विविध पक्षांच्या कार्यक्रमांत भाग घेत असतात. स्वरा भास्कर यांनी आम आदमी पक्षाच्या उमेदवारांचा प्रचार केला होता. राहुल गांधी यांच्या भारत जोडो यात्रेत त्या सामील झाल्या होत्या.

स्वरा भास्कर या मुळच्या दिल्लीच्या असून फहाद अहमद हे उत्तर प्रदेशातील बरेलीचे रहिवासी आहेत. फहाद अहमद यांनी मुंबईतील टाटा इन्स्टिट्यूट ऑफ सोशल सायन्सेसमधून समाजशास्र विषयात शिक्षण घेतले आहे. टाटा इन्स्टिट्यूटमध्ये फहाद हे विद्यार्थी संघटनेचे सरचिटणीस होते. जुलै २०२२ साली त्यांनी समाजवादी पार्टीत प्रवेश केला. ते सपाच्या युवजन सभेचे महाराष्ट्राचे अध्यक्ष होते. अणुशक्ती नगरमधून तिकीट जाहीर झाल्यानंतर त्यांनी राष्ट्रवादी कॉंग्रेसम-शरद पवार गटात प्रवेश आहे.