Mumbai Rain : मुंबईत १० तासात १०० मीमी पाऊस! पावसामुळे लोकल, विमानसेवा प्रभावित; हवामान विभागानं दिला आज यलो अलर्ट

मुंबई,  आणि उपनगरात रविवारी सायंकाळपर्यंतच्या दहा तासांत १०० मिलिमीटरपेक्षा जास्त पाऊस पडण्याची नोंद झाली. या पावसामुळे अनेक भागातील रस्ते पाण्याखाली गेले, विमानांचे मार्ग बदलण्यात आले तर  मध्य रेल्वेच्या दादर ते माटुंगा स्थानकांदरम्यान लोकल वाहतुकीवर पाणी साचल्याने लोकल वाहतुकीवर परिणाम झाला. दरम्यान, आज देखील पावसाचा यलो अलर्ट मुंबईला देण्यात आला आहे. 

हवमान विभागाने दिलेल्या माहितीनुसार मुंबई शहरात  रविवारी  सकाळी ८  ते सायंकाळी ६  या दहा तासांत १०० मिमी, तर पूर्व व पश्चिम उपनगरात अनुक्रमे ११८ मिमी आणि ११० मिमी पावसाची नोंद झाली.

मुंबईमधील काही भागांमध्येही आज मुसळधार पावसाचा अंदाज वर्तवण्यात आला असून यलो अलर्ट देण्यात आला आहे. मुंबईचं तापमान कमाल ३२ तर आणि किमान २२ डिग्री सेल्सिअस राहणार आहे.  

मुसळधार पावसामुळे दुपारी चार वाजेपर्यंत मुंबई विमानतळावरील एकूण ३६ उड्डाणे रद्द करण्यात आली होती. तर  एअर इंडिया, इंडिगो आणि अकासा या विमानांसह १५ विमाने जवळच्या विमानतळांवर, प्रामुख्याने अहमदाबादकडे वळविण्यात आली.  मुसळधार पावसामुळे दिवसभरात दोन वेळा, दुपारी १२ वाजून १२ मिनिटांनी आठ मिनिटे आणि नंतर दुपारी १ ते १ वाजून १५ मिनिटांपर्यंत धावपट्टीचे कामकाज बंद ठेवावे लागले होते. 

मानखुर्द, पनवेल आणि कुर्ला स्थानकांजवळ पाणी साचल्याने हार्बर मार्गावरील लोकल सेवा १५ ते २० मिनिटे उशिराने धावली, तर पश्चिम रेल्वेमार्गावरील सेवा सुरळीत सुरू होती. सायंकाळी दादर ते माटुंगा स्थानकांदरम्यान डाऊन जलद मार्गावरील मध्य रेल्वेच्या सेवेवर परिणाम झाला. तसेच अप आणि डाऊन जलद मार्गावर दादर येथे रुळांवर पाणी साचल्याने ही समस्या अधिक चव्हाट्यावर आली आहे.

शहराच्या अनेक भागात पाणी साचल्याने काही बसेस वळविण्यात आल्या. डीएन नगरमधील अंधेरी भुयारी मार्ग बंद करण्यात आला असून पाणी साचल्याने दक्षिणेकडे जाणारी वाहतूक गोखले पूल मार्गे आणि उत्तरेकडे जाणारी वाहतूक ठाकरे पुलामार्गे वळविण्यात आली आहे. त्याचप्रमाणे खार भुयारी मार्ग बंद झाल्याने लिंकिंग रोडमार्गे वाहतूक वळविण्यात आली. ट्रॉम्बे येथील महाराष्ट्र नगर भुयारी मार्गही पुरामुळे वाहतुकीसाठी बंद करण्यात आला आहे. मध्य मुंबईतील वडाळा आणि माटुंगा येथे पाण्याखाली गेलेल्या रस्त्यांवर अनेक वाहने अडकली होती. 

मुख्यमंत्री एकनाथ शिंदे यांनी महाराष्ट्रातील अनेक भागात मुसळधार पावसाच्या पार्श्वभूमीवर अधिकाऱ्यांना सतर्क राहण्याचे आदेश दिले आहेत. राज्य आपत्ती प्रतिसाद दल, स्थानिक प्रशासन, महापालिका, पोलिस आदींनी भारतीय हवामान खात्याकडून हवामानाची नियमित माहिती घेऊन त्यानुसार नियोजन करून नागरिकांना दिलासा द्यावा, असे आदेश त्यांनी दिले आहेत. 

मुसळधार पावसात नवी मुंबईतील बेलापूर नोडमधील टेकडीवर पाण्यात अडकलेल्या ६० पिकनिक स्वारांची रविवारी सुटका करण्यात आली. दुपारी दीड वाजेपर्यंतच्या पाच तासांत नवी मुंबईत ८३.३८ मिलिमीटर पावसाची नोंद झाल्याने वाशी, नेरुळ, सानपाडा येथील अनेक भागात पाणी साचले होते. 

दरम्यान, मुंबई आणि मीरा-भाईंदरमधील रस्त्यांवरील खड्डे बुजवतानाचे व्हिडिओ सोशल मीडियावर व्हायरल झाल्यानंतर शिवसेना नेते आदित्य ठाकरे यांनी राज्य सरकारवर टीका केली आहे.