wildfire in South Korean : दक्षिण कोरियात अग्नीतांडव; गंगन्युंग शहरात जंगलात पेटला भीषण वणवा; ५०० नागरिकांचे स्थलांतर

दक्षिण कोरियाच्या गंगन्युंग शहरात एका छोट्या आगीचे रूपांतर भीषण वणव्यात झाले. जोरदार वाऱ्यांमुळे मंगळवारी सकाळी ही आग लागली. ही आग एवढी भीषण होती की समुद्रकिनाऱ्यांपासून किलोमीटर अंतरावरुन आगीचे लोळ दिसून येत होते. 

वणव्याची आग संपूर्ण परिसरात पासरल्याने तब्बल ५०० नागरिकांना त्यांच्या घरातून  बाहेर काढून सुरक्षितस्थळी नेण्यात आले आहे.  या भीषण आगीत अग्निशमन दलाच्या दोन कर्मचाऱ्यांसह तीन जण जखमी झाले.  

जोरदार वाऱ्याने हायटेंशन वीज वाहिनीच्या तारा एकमेकांना घासल्या. यामुळे आगीचे लोळ खाली पडून एका झाडाला आग लागली. यावेळी हवेचा वेग जास्त असल्याने हळू हळू आगीने भीषण रूप धारण केले.  या आगीमुळे एका घराला देखील भीषण आग लागली. अग्निशमन दलाच्या जवानांना या जळालेल्या घरात दुपारी एक मृतदेह आढळून आला. सोसाट्याच्या वाऱ्यामुळे आग विझवणे अग्निशमन दलाला कठीण झाले होते, मात्र पाऊस आल्याने ही आग आटोक्यात आली. 

या आगीचे अनेक फोटो आणि व्हिडिओ व्हायरल झाले आहेत. एक छोटी आग संपूर्ण जंगलाला नष्ट करू शकते आणि संपूर्ण शहराला कसा फटका बसला हे यातून दाखवण्यात येत आहे.  

जंगलातील आगीमुळे होणारी जीवितहानी कमी करण्यासाठी, दक्षिण कोरियाचे अध्यक्ष यून सुक येओल यांनी या आगीवर नियंत्रण मिळवण्यासाठी आणि जवळच्या रहिवाशांना त्वरीत बाहेर काढण्यासाठी आदेश दिले आहे. त्यानुसार तब्बल ५०० नागरिकांना स्थलांतरित करण्यात आले आहे. 

सुदैवाने, जंगलातील आगीमुळे कोणतीही मोठी जीवितहानी झाली नाही. परंतु अपघातामुळे घरांचे व मालमत्तेचे मोठे नुकसान झाले. 

बचाव कार्यात, अग्निशामक दलाने स्थानिक रहिवाशांना त्यांच्या गावातील गुरे बाहेर काढण्यास मदत केली. 

या भीषण आगीमुळे या परिसरात धुराचे ढग झाले आहेत. यामुळे नागरिकांना  श्वासोच्छवासास घेण्यास अडचणी होत आहे. या धूरामुळे नागरिकांना आजार होण्याची देखील शक्यता व्यक्त केली जात आहे.