फडणवीस यांच्या मंत्रिमंडळात लाडक्या बहिणींना संधी; चार महिला आमदारांना मिळालं मंत्रिपद!
फडणवीस यांच्या मंत्रिमंडळात लाडक्या बहिणींना संधी; चार महिला आमदारांना मिळालं मंत्रिपद!
Dec 16, 2024 01:34 PM IST
- महायुती सरकारच्या मंत्रिमंडळात एकूण चार महिलांना संधी देण्यात आली, ज्यात भाजप नेत्या पंकजा मुंडे, माधुरी मिसाळ यांच्यासह अन्य दोन महिला आमदारांचा समावेश आहे.
(1 / 3)
पंकजा मुंडे: नागपूरच्या विधीमंडळात महायुतीच्या मंत्र्यांच्या शपथविधीमध्ये भाजपचे दिवंगत नेते गोपीनाथ मुंडे यांच्या कन्या आणि भाजप नेत्या पंकजा मुंडे यांनी मंत्रिपदाची शपथ घेतली आहे. पंकजा मुंडे २००९ च्या विधानसभा निवडणुकीत बीड जिल्ह्यातील परळी विधानसभा मतदारसंघातून निवडून आल्या. त्या २०१९ ऑक्टोबरपर्यंत सलग दोन टर्म आमदार होत्या. मात्र, २०१९ च्या विधानसभा निवडणुकीत त्यांना त्यांचे बंधू आणि राष्ट्रवादीचे नेते धनंजय मुंडे यांच्याकडून पराभव स्वीकारावा लागला. लोकसभा निवडणुकीत भाजपने बीड लोकसभा मतदारसंघातून पंकजा मुंडे यांना संधी दिली होती. मात्र, काँग्रेसच्या बजरंग सोनवणे यांनी पंकजा मुंडे यांचा साडेसहा हजार मतांनी पराभव केला. त्यानंतरही भाजपने त्यांना मंत्रिमंडळात स्थान दिले.
(2 / 3)
अदिती तटकरे: राष्ट्रवादी काँग्रेसने अदिती तटकरे यांना मंत्रीमंडळात संधी देण्यात आली. त्यांनी मागील सरकारमध्ये महिला व बाल विकास मंत्री म्हणून काम केले. त्यांना यंदाही मंत्रिमंडळात स्थान मिळाले आहे. आदिती तटकरे या अजित पवार गटाचे नेते सुनील तटकरे यांच्या कन्या आहेत. त्या २०१९ च्या महाराष्ट्र विधानसभा निवडणुकीतून पहिल्यांदा श्रीवर्धन मतदारसंघात जिंकून आमदार झाल्या. महाराष्ट्र विधानसभा निवडणुकीआधी महायुती सरकारने सुरू केलेल्या लाडकी बहिण योजनेमुळे त्यांची राज्यात मोठी चर्चा होती.
(3 / 3)
माधुरी मिसाळ: पुण्यातील पर्वतीच्या आमदार माधुरी मिसाळ यांना पहिल्यांदाच राज्यमंत्रिमंडळात संधी मिळाली आहे. मंत्रिमंडळात स्थान मिळालेल्या पश्चिम महाराष्ट्रातील एकमेव महिला आमदार ठरल्या आहेत. दरम्यान, २००७ मध्ये नगरसेविका म्हणून निवडून आल्यानतंर २००९ पासून त्या सलग चार वेळा पर्वती मतदारसंघाच्या आमदार राहिल्या आहेत. २०२४ च्या विधानसभा निवडणुकीआधी त्यांच्या विधानसभेच्या तिकीटासाठी भाजपमध्ये रस्सीखेच सुरू होती. पण भाजपच्या वरिष्ठ नेत्यांनी त्यांच्यावर विश्वास दाखवला आणि त्यांनी पर्वती मतदारसंघातून विजय मिळवला. त्यांनी शरद पवार गटाच्या अश्विनी कदम यांचा ५४ हजार ६६० मतांनी पराभव केला. आता भाजपच्या वरिष्ठ नेत्यांनी त्यांच्यावर राज्य मंत्रीपदाची जबाबदारी सोपवली आहे.
(4 / 3)
मेघना बोर्डीकर: जिंतूर विधानसभा मतदारसंघातून दुसऱ्यांदा निवडून आलेल्या मेघना बोर्डीकर यांनी नुकतीच राज्यमंत्रीपदाची शपथ घेतली आहे. परभणी जिल्ह्याच्या राजकारणावर अबाधित वर्चस्व राखणारे माजी आमदार रामप्रसाद बोर्डीकर यांच्या त्या कन्या आहेत. विधानसभा निवडणुकीत त्यांनी शरद पवार गटातील विजय माणिकराव भांबळे यांचा पराभव केला.
इतर गॅलरीज