Youngest Lok Sabha MP: अवघे २५ वयमान अन् गळ्यात पडली खासदारकीची माळ!

नावः संजना जाटव; वय २५; मतदारसंघ: भरतपूर (राजस्थान) 

कॉंग्रेस पक्षाची खासदार संजना जाटव ही लोकसभेवर निवडून आलेली सर्वात तरुण खासदार आहे. संजनाने लोकसभा निवडणूक २०२४मध्ये भाजपचे माजी खासदार रामस्वरुप कोळी यांचा ५१ हजार ९८३ मतांनी पराभव केला आहे. संजना ही मूळ अलवर जिल्ह्यात असलेल्या कठूमर तालुक्यातील हसील या गावची रहिवासी आहे. संजनाचा पती कप्तान सिंह हा अलवरच्या खेडलीचा रहिवासी असून तो राजस्‍थान पोलीसमध्ये कॉन्स्टेबल म्हणून कार्यरत आहे. संजना जाटव हिने एलएलबी पर्यंतचे शिक्षण घेतले आहे. ती यापूर्वी अलवर जिल्हा परिषदेची सदस्‍य म्हणून निवडून आली होती. संजना ही कॉंग्रेस सरचिटणीस प्रियंका गांधी यांच्या जवळची तरुण नेता मानली जाते. संजना ही प्रियंका गांधी यांनी सुरू केलेल्या 'लडकी हूं, लड सकती हूं' या अभियानात सक्रीय आहे.

नावः प्रिया सरोज; वय २५; मतदारसंघः मछलीशहर (उत्तर प्रदेश) 

उत्तर प्रदेशातील मछलीशहर लोकसभा मतदारसंघात समाजवादी पार्टीची उमेदवार प्रिया सरोज हिने भाजप उमेदवार भोलानाथ सरोज यांचा ३५ हजार ८५० मतांनी पराभव केला. प्रियाचे वडील तुफानी सरोज हे यापूर्वी तीन वेळा खासदार होते. सध्या ते समाजवादी पार्टीचे आमदार आहेत. प्रियाचे शालेय शिक्षण दिल्लीच्या एअरफोर्स गोल्डन ज्युबिली इन्स्टिट्यूट येथे झाले आहे. त्यानंतर दिल्ली विद्यापीठातून कायद्याचे शिक्षण घेतल्यानंतर ती सध्या सर्वोच्च न्यायालयात वकीली करत आहे. 

नावः शांभवी चौधरी; वयः २५ वर्ष; मतदारसंघः समस्तीपूर (बिहार)

लोकजनशक्ती पार्टी (रामविलास)ची उमेदवार शांभवी चौधरी हिने बिहारच्या समस्तीपूर लोकसभा मतदारसंघातून विजय मिळवला आहे. शांभवीने दिल्ली विद्यापीठाच्या लेडी श्रीराम कॉलेजमधून पदवीचे शिक्षण पूर्ण केले असून दिल्ली कॉलेज ऑफ इकोनॉमिक्समधून अर्थशास्त्रात पोस्ट ग्रॅज्युएट केलं आहे. ती सध्या मगध विद्यापीठातून पीएचडीचा अभ्यास करतेय. शांभवीला कुटुंबातून राजकीय वारसा लाभला असून तिचे वडील अशोक चौधरी हे जेडी(यू)चे आमदार असून नीतीश कुमार मंत्रिमंडळात ग्रामीण विकास खात्याचे मंत्री आहेत. शांभवीचे आजोबा कॉंग्रेसकडून ९ वेळा आमदार म्हणून निवडून आले होते. सांभवीचे पती सायण कुणाल हे बिहार धार्मिक न्यास बोर्डाचे माजी अध्यक्ष आचार्य किशोर कुणाल यांचा मुलगा आहे. 

नावः पुष्पेंद्र सरोज; वयः २५; मतदारसंघ कौशंबी (उत्तर प्रदेश) 

उत्तर प्रदेशात कौशंबी लोकसभा मतदारसंघात समाजवादी पार्टीचे उमेदवार पुष्पेंद्र सरोज यांनी भाजप उमेदवार विनोदकुमार सोनकर यांचा १ लाख ३,९४४ मतांनी पराभव करत सर्वात तरुण वयात खासदार होण्याचा मान मिळवला. पुष्पेंद्र याने लंडन येथील क्विन मेरी युनिवर्सिटीमधून अकौंटंसी आणि मॅनेजमेंटचे शिक्षण घेतले आहे. पुष्पेंद्रला मजबूत असा राजकीय वारसा लाभला आहे. त्याचे वडील इंद्रजीत सरोज हे समाजवादी पार्टीचे राष्ट्रीय सरचिटणीस तसेच माजी कॅबिनेट मंत्री होते. २०१९ च्या लोकसभा निवडणुकीत सोनकर यांनी इंद्रजीत यांचा पराभव केला होता. 

नावः सागर खांडरे; वयः २५ वर्ष; मतदारसंघ: बिदर (कर्नाटक)

कर्नाटकातील बिदर लोकसभा मतदारसंघात कॉंग्रेस उमेदवार सागर खांडरे याने भाजप खासदार, माजी मंत्री भगवंत खुबा यांचा १ लाख २८ हजार ८७५ मतांनी पराभव केला. सागर हा कर्नाटकचे वनमंत्री ईश्वर खांडरे यांचा मुलगा आणि राज्यातील ज्येष्ठ कॉंग्रेस नेते भीम अण्णा खांडरे यांचा नातू आहे. सागर याने एलएलबीपर्यंत शिक्षण पूर्ण केले आहे. कर्नाटकात एनएसयूआयच्या विद्यार्थी चळवळीत तो सक्रीय आहे.