IPL 2024 Purple and Orange Cap : पर्पल कॅप बुमराहच्या डोक्यावर विराजमान, ऑरेंज कॅपमध्ये विराट-रियान परागमध्ये चुरस

मुंबई इंडियन्सच्या जसप्रीत बुमराहने गुरुवारी (११ एप्रिल) रॉयल चॅलेंजर्स बेंगळुरूविरुद्ध धडाकेबाज कामगिरी केली. त्याने ४ षटकांत २१ धावा देत ५ विकेट्स घेतल्या. यासह बुमराह आयपीएल २०२४ मध्ये सर्वाधिक विकेट्स घेणाऱ्या गोलंदाजांच्या यादीत अव्वल स्थानी पोहोचला आहे. बुमराहने आतापर्यंत ५ सामन्यांत १० बळी घेतले आहेत. पण बुमराहचा इकॉनॉमी रेट चहलपेक्षा चांगला आहे. बुमराहचा इकॉनॉमी रेट ५.९५ आहे

पर्पल कॅपच्या यादीत राजस्थान रॉयल्सचा युजवेंद्र चहल दुसऱ्या स्थानावर घसरला आहे. सध्या सुरू असलेल्या इंडियन प्रीमियर लीगमध्ये युझीने आतापर्यंत ५ सामन्यात १० बळी घेतले आहेत. इकॉनॉमी रेट ७.३३ आहे. 

चेन्नई सुपर किंग्जचा मुस्तफिजुर रहमान आयपीएलमध्ये सर्वाधिक विकेट्स घेणाऱ्या गोलंदाजांच्या यादीत तिसऱ्या क्रमांकावर आला आहे. सीएसकेच्या स्टार वेगवान गोलंदाजाने ४ सामन्यात ९ बळी घेतले आहेत. मुस्तफिजुरचा इकॉनॉमी रेट ८.०० आहे. 

पंजाब किंग्जचा अर्शदीप सिंग आयपीएल २०२४ मध्ये सर्वाधिक विकेट घेणाऱ्या गोलंदाजांच्या यादीत चौथ्या क्रमांकावर आहे. अर्शदीपने ५ सामन्यात ८ विकेट्स घेतल्या आहेत.

पर्पल कॅपच्या यादीत गुजरात टायटन्सचा मोहित शर्मा पाचव्या क्रमांकावर आहे. मोहितने सध्या सुरू असलेल्या इंडियन प्रीमियर लीगमध्ये आतापर्यंत ६ सामन्यात ८ विकेट्स घेतल्या आहेत. यानंतर मुंबईचा गेराल्ड कोएट्झीच्या नावावर ८ विकेट्स आहेत. पण इकॉनॉमी रेटनुसार मोहित कोएट्झीच्या पुढे आहे.

ऑरेंज कॅपच्या यादीत रॉयल चॅलेंजर्स बेंगळुरूचा विराट कोहली अव्वल आहे. कोहलीने ६ सामन्यात ३१९ धावा केल्या आहेत. कोहलीने ७९.७५ च्या सरासरीने आणि १४१.७७ च्या स्ट्राईक रेटने धावा केल्या आहेत.

राजस्थान रॉयल्सच्या रियान परागने ऑरेंज कॅपच्या लढाईत दुसरे स्थान कायम राखले आहे. रियानने सध्या ५ सामन्यात २६१ धावा केल्या आहेत. त्याची सर्वोच्च धावसंख्या नाबाद ८४ आहे. 

गुजरात टायटन्सचा कर्णधार शुभमन गिल ऑरेंज कॅपच्या यादीत तिसऱ्या क्रमांकावर आहे. त्याने आता ६ सामन्यात २५५ धावा केल्या आहेत. त्याची सर्वोच्च धावसंख्या नाबाद ८९ धावा आहे. 

राजस्थान रॉयल्सचा कर्णधार संजू सॅमसन सध्या सुरू असलेल्या आयपीएलमध्ये सर्वाधिक धावा करणाऱ्या फलंदाजांच्या यादीत चौथ्या क्रमांकावर आहे. संजूने आतापर्यंत ५ सामन्यात २४६ धावा केल्या आहेत. नाबाद ८२ ही त्याची सर्वोच्च धावसंख्या आहे.

गुजरात टायटन्सचा साई सुदर्शन ऑरेंज कॅपच्या यादीत पाचव्या क्रमांकावर आहे. त्याच्या नावावर ६ सामन्यात एकूण २२६ धावा आहेत. सुदर्शनची सर्वोच्च धावसंख्या ४५ आहे.