Rohit Sharma: रोहित शर्माची खास विक्रमाला गवसणी, अशी कामगिरी करणारा जगातील तिसरा फलंदाज!

रोहित शर्माने वर्ल्ड कप २०२४ मध्ये आयर्लंडविरुद्धच्या सामन्यात शानदार अर्धशतक झळकावले. या कामगिरीच्या जोरावर रोहित शर्माने नव्या विक्रमाला गवसणी घातली आहे. रोहित शर्माने विराट कोहली आणि बाबर आझमसह एलिट लिस्टमध्ये स्थान मिळवले.

नासाऊ काउंटी आंतरराष्ट्रीय क्रिकेट स्टेडियमवर बुधवारी आयर्लंडविरुद्ध रोहित शर्माने ३६ चेंडूत ४ चौकार आणि ३ षटकारांच्या मदतीने आपले अर्धशतक पूर्ण केले. त्यानंतर ५२ व्या धावांवर असताना तो बाद झाला. रोहितने आंतरराष्ट्रीय टी-२० क्रिकेटमध्ये ४ हजार धावांचा टप्पा ओलांडला. भारतीय कर्णधाराला लक्ष्य गाठण्यासाठी २६ धावांची गरज होती, जी त्याने सहज जमवली.

आयर्लंड सामन्याअखेर रोहित शर्माची आंतरराष्ट्रीय टी-२० क्रिकेटमधील एकूण धावसंख्या ४०२६ इतकी होती. त्याने १५२ सामन्यांच्या १४४ डावांत ही धावा केली. रोहितने टी-२० आंतरराष्ट्रीय क्रिकेटमध्ये ५ शतके आणि ३० अर्धशतके झळकावली. रोहितच्या आधी फक्त विराट कोहली आणि बाबर आझम यांनी टी-२० आंतरराष्ट्रीय क्रिकेटमध्ये ४ हजार धावांचा टप्पा ओलांडला. त्यामुळे जगातील तिसरा क्रिकेटपटू म्हणून हिटमॅनने हा टप्पा ओलांडला.

काही दिवसांपूर्वी पाकिस्तानचा कर्णधार बाबर आझमने रोहित शर्माला मागे टाकत टी-२० मध्ये सर्वाधिक धावा करणारा दुसरा फलंदाज बनला होता. यावेळी रोहितने बाबरपाठोपाठ दुसरे स्थान पटकावले. रोहित पहिल्या क्रमांकावर विराटपेक्षा १२ धावांनी पिछाडीवर आहे. बाबर आझमने ११९ टी-२० आंतरराष्ट्रीय सामन्यांच्या ११२ डावात ४ हजार २३ धावा केल्या आहेत, ज्यात ३ शतके आणि ३६ अर्धशतकांचा समावेश आहे.