Israel attack hospital: इस्त्रायलचा गाझा पट्टीतील हॉस्पिटलवर भीषण रॉकेट हल्ला, ५०० नागरिक ठार

इस्रायलच्या लष्कराने मंगळवारी, १७ ऑक्टोबर रोजी गाझा पट्टीत एका हॉस्पिटलवर घातक हवाई हल्ला केला. या हल्ल्यात तब्बल ५०० पॅलेस्टिनी नागरिक ठार झाले असल्याचं गाझा आरोग्य मंत्रालयाने म्हटलं आहे. गेल्या १५ वर्षांत इस्त्रायलचा गाझावर करण्यात आलेला हा सर्वाधिक भीषण हवाई हल्ला असल्याचं म्हटलं जातय.

हवाई हल्ल्यात गाझा पट्टीतील अल-अहली हॉस्पिटलचा पार चुराडा झाला आहे. हॉस्पिटलच्या वेगवेगळ्या वॉर्डात आग पसरली असून सर्वत्र काचा फुटल्याचे आणि शरीराचे तुकडे विखुरलेले दिसत आहेत. इस्त्रायली हल्ल्यापासून वाचण्यासाठी गाझा पट्टीतील नागरिक हॉस्पिटलमध्ये आसरा घेत आहेत. इस्त्रायल किमान हॉस्पिटलवर तरी हल्ले करणार नाही, याची खात्री बाळगून नागरिक आसरा घेत आहेत.

‘हमास’ अतिरेक्यांच्या हल्ल्यानंतर इस्रायली लष्कराने गाझा पट्टीला संपूर्ण वेढा घातला आहे. गाझा पट्टीमध्ये बाहेरून पाणी, इंधन आणि खाद्यपदार्थ नेण्यास इस्त्रायलने बंदी घातली आहे. या वेढ्यामुळे गाझा पट्टीत राहणारे २३ लाख नागरिकांना हताश झाले आहेत. गाझा पट्टीतील नागरिकांना जीवनावश्यक वस्तु पुरण्यासाठी इस्त्रायलने मार्ग काढावा असं आवाहन अमेरिकेचे परराष्ट्र मंत्री अँथनी ब्लिंकेन यांनी इस्त्रायलचे पंतप्रधान बेंजमीन नेतनयाहू यांनी केलं होतं.

‘हमास’ने काही इस्रायली नागरिकांना ओलिस ठेवले असून त्यांना सुखरुप परत मिळवण्यासाठी इस्त्रायलची धडपड सुरू आहे. इस्रायलने गाझातील नागरिकांना जीवनावश्यक वस्तुंचा पुरवठा करण्यास परवानगी देण्यापूर्वी ‘हमास’ने अपहरण केलेल्या २०० इस्रायली नागरिकांच्या सुटकेची मागणी केली आहे.