David Warner : शेवटच्या कसोटीत वॉर्नर योद्ध्यासारखा उतरला, पठ्ठ्यानं अखेरची कसोटी यादगार बनवली

डेव्हिड वॉर्नरने आपला शेवटचा कसोटी सामना सिडनी येथे खेळला. त्याने आपल्या करिअरच्या शेवटच्या सामन्यात शानदार कामगिरी केली आणि क्रिकेट जगताचा निरोप घेतला. वॉर्नरने आपल्या शेवटच्या कसोटी डावात शानदार अर्धशतक झळकावले.

वॉर्नरने  ७ चौकारांसह ५७ धावांची झटपट खेळी केली. त्याने करिअरच्या शेवटच्या कसोटीतील पहिल्या डावात ३४ तर दुसऱ्या डावात ५७ धावा केल्या. अशा प्रकारे त्याने आपल्या शेवटच्या कसोटीत ९१ धावा करत आपल्या सुवर्ण कारकिर्दीचा शेवट केला.

तत्पूर्वी, डेव्हिड वॉर्नरने त्याच्या शेवटच्या कसोटी डावात एखाद्या योद्ध्याप्रमाणे मैदानात उतरला आणि पहिल्या चेंडूपासून फटके खेळण्यास सुरुवात केली.

डेव्हिड वॉर्नर जेव्हा ड्रेसिंग रूममधून फलंदाजीसाठी मैदानावर येत होता, तेव्हा त्याच्या डोळ्यात तीच जुनी चमक दिसत होती. 

डेव्हिड वॉर्नरने शेवटच्या कसोटी डावासाठी मैदानात उतरताना देशाच्या ध्वजाला स्पर्श केला. त्याला हे करताना पाहून ऑस्ट्रेलियन क्रिकेट चाहत्यांनी आनंदाने उड्या मारल्या आणि मैदानात वॉर्नरच्या नावाने घोषणा दिल्या.

डेव्हिड वॉर्नर शेवटच्या कसोटी डावासाठी मैदानात आला तेव्हा पाकिस्तानी संघातील सर्व खेळाडूंनी टाळ्या वाजवून त्याला अभिवादन केले. 

सिडनी कसोटीच्या पहिल्या दिवशी डेव्हिड वॉर्नर आपल्या मुलींसोबत मैदानात आला होता. वॉर्नर अनेकदा क्रिकेट सामन्यांदरम्यान कुटुंबासोबत दिसतो. आज वॉर्नरच्या मुलीसंह त्याची पत्नीदेखील SCG वर उपस्थित होती.

डेव्हिड वॉर्नर ऑस्ट्रेलियाच्या क्रिकेट इतिहासातील एकमेव खेळाडू आहे, ज्याने प्रथम श्रेणी क्रिकेट न खेळता थेट कसोटी क्रिकेटमध्ये पदार्पण केले. वॉर्नरने २०११ मध्ये न्यूझीलंडविरुद्ध पहिला कसोटी सामना खेळला होता. तेव्हापासून, तो ऑस्ट्रेलियासाठी ११२ सामने खेळला.

वॉर्नरने कसोटीत ८७७६ धावा केल्या. कसोटी कारकिर्दीत वॉर्नरने २६ शतके आणि ३७ अर्धशतके केली, तर तीन वेळा त्याने २०० किंवा त्याहून अधिक धावांची खेळी केली.

वॉर्नरने ऑस्ट्रेलियाकडून १६१ एकदिवसीय आणि ९९ टी-20 सामने खेळले आहेत. वॉर्नरने एकदिवसीय क्रिकेटमध्ये ६९३२ धावा केल्या आहेत, तर टी-20 मध्ये त्याच्या नावावर २८९४ धावा आहेत.