बॉलिवूडच्या ‘या’ चित्रपटांच्या प्रमोशनसाठी खर्च झाला नाही एकही रुपया! काहींनी दाखवली जादू तर काही झाले फ्लॉप

एखादा बॉलिवूड चित्रपट प्रदर्शित होतो, तेव्हा त्याची जगभरात चर्चा सुरू होते. चित्रपटातील प्रत्येक कलाकार आपल्या चित्रपटाच्या प्रमोशनसाठी रात्रंदिवस मेहनत करतो. काही लोक प्रसिद्धी मिळवण्यासाठी चित्रपटातील काही क्लिप देखील लीक करतात. चित्रपटाचे प्रमोशन व्हावे म्हणून काय वाटेल ते स्टंट केले जातात. पण, काही चित्रपट असे आहेत जे, कोणत्याही प्रमोशनशिवायच मोठ्या पडद्यावर रिलीज झाले आहेत. चला जाणून घेऊया अशाच काही चित्रपटांबद्दल…

लेडी किलर: अर्जुन कपूर आणि भूमी पेडणेकर यांचा 'द लेडी किलर' हा चित्रपट पुन्हा एकदा चर्चेत आला आहे. हा चित्रपट ३ नोव्हेंबर २०२३ रोजी काही मोजक्या चित्रपटगृहांमध्ये प्रदर्शित झाला होता. मात्र, या चित्रपटाचे प्रमोशन झाले नाही. या कारणास्तव हा चित्रपटही फ्लॉप झाला होता. मात्र, आता हा चित्रपट काल यूट्यूबवर प्रदर्शित झाला आहे. आता प्रेक्षक युट्युबवर या चित्रपटाचा आनंद घेत आहेत.

दंगल: आमिर खान त्याच्या चित्रपटांचे प्रमोशन करत नाही. त्याचा चित्रपट चित्रपटगृहात येताच चाहत्यांना कळते की, मिस्टर परफेक्शनिस्ट काहीतरी धमाकेदार घेऊन येत आहे. मात्र, आमिर खान आपल्या चित्रपटांच्या प्रमोशनसाठी फारसे प्रयत्न करत नाही. जेव्हा 'दंगल' रिलीज झाला तेव्हा आमिरला प्रमोशनसाठी कोणतीही खास रणनीती आखावी लागली नाही आणि आशयामुळे चाहत्यांना हा चित्रपट आवडला.

पीके: २०१४मध्ये रिलीज झालेला आमिर खान आणि अनुष्का शर्माचा ‘पीके’ही या यादीत सामील आहे. चित्रपटाच्या प्रमोशनमध्ये दोन्ही स्टार्सनी अजिबात घाम गाळला नाही. मात्र, चित्रपट प्रदर्शित होताच, कथेवर इतका वाद झाला की, हा चित्रपट आपोआपच चर्चेचा विषय बनला आणि लोकांना थिएटरकडे आकर्षित केले. त्याचा परिणाम बॉक्स ऑफिस कलेक्शनवर स्पष्टपणे दिसून आला.

गँग्स ऑफ वासेपूर: २०१२मध्ये रिलीज झालेला अनुराग कश्यपचा 'गँग्स ऑफ वासेपूर' हा ब्लॅक कॉमेडी चित्रपट आहे, ज्याला संपूर्ण देशाने डोक्यावर उचलून घेतलं होतं. या चित्रपटाला कोणत्याही प्रमोशनची गरज भासली नव्हती. त्यावेळी, हा चित्रपट हिट झाल्यानंतर, त्याचा सिक्वेल देखील आणला गेला आणि तो पूर्वीपेक्षाही मोठा हिट ठरला.