डीव्हिलियर्स ते धोनी… या ५ क्रिकेटपटूंच्या निवृत्तीनं चाहत्यांना रडवलं, पाहा
डीव्हिलियर्स ते धोनी… या ५ क्रिकेटपटूंच्या निवृत्तीनं चाहत्यांना रडवलं, पाहा
Dec 21, 2024 10:47 PM IST
- टीम इंडियाचा फिरकीपटू आर अश्विन याने अचानक निवृत्ती घेतली. त्याच्यामध्ये आणखी काही वर्षांचे क्रिकेट बाकी असताना त्याने अचानक थांबण्याचा निर्णय घेतला. येथे आपण अशाच काही खेळाडूंबाबत जाणून घेणार आहोत, जे करिअरच्या चांगल्या टप्प्यात असतानादेखील क्रिकेटमधून निवृत्ती घेतली.
(1 / 9)
कोणत्याही खेळाडूची निवृत्ती ही चाहत्यांच्या मनाला चटका लावणारीच असते. पण क्रिकेट विश्वात काही खेळाडूंनी अशा पद्धतीने निवृत्ती घेतल्या आहेत, ज्यामुळे चाहत्यांना फार मोठा धक्का बसला. कारण हे खेळाडू अगदी जोमात असताना रिटायर झाले होते. यामध्ये सर्वात मोठे नाव एबी डीव्हिलियर्स याचे होते.
(2 / 9)
एम एस धोनी- टीम इंडियाचा सर्वात यशस्वी कर्णधार एम एस धोनी याने १५ ऑगस्ट २०२० रोजी आंतरराष्ट्रीय क्रिकेटमधून निवृत्तीची घोषणा केली. पण त्याच्याआधी त्याने ३० डिसेंबर २०१४ रोजी मेलबर्न येथे कसोटी मालिकेच्या मधातच अचानक निवृत्तीची घोषणा केली. टीम इंडियाची कसोटीत खराब कामगिरी सुरू होती आणि भारताचा मायदेशात इंग्लंडविरुद्धच्या कसोटी मालिकेत पराभव झाला होता. यामुळे कर्णधार म्हणून धोनीवर टीकेची झोड उठली होती.
(3 / 9)
धोनीने ऑस्ट्रेलिया दौऱ्यावर असताना कसोटीतून निवृत्ती घेतली. मेलबर्न कसोटी संपल्यानंतर कर्णधारांच्या पत्रकार परिषदेत धोनीने निवृत्तीचा कोणताही उल्लेख केला नाही. पण बीसीसीआयने प्रसिद्धीपत्रकाद्वारे ही घोषणा केली. त्यावेळी संघाचे कोच रवी शास्त्री म्हणाले की, धोनीने ५ मिनिटांच्या भाषणात निवृत्तीची घोषणा केली. तेव्हा या निर्णयाची कोणालाच कल्पना नव्हती. सर्वांनाचा हा आश्चर्याचा धक्का होता.
(4 / 9)
एबी डिव्हिलियर्स- एबी डिव्हिलियर्सच्या आंतरराष्ट्रीय कारकिर्दीचा शेवटचा टप्पा चढ-उतारांचा होता. त्याची कामगिरी कधीच खालावली नाही, पण तरी दक्षिण आफ्रिकेच्या मॅनेजमेंटकडून त्याच्या कसोटी क्रिकेट खेळण्याच्या बांधिलकीवर प्रश्नचिन्ह उपस्थित करण्यात आले होते. यानंतर २३ मे २०१८ रोजी त्याने आपल्या सोशल मीडिया चॅनेलवर एक लांबलचक व्हिडीओ पोस्ट केला आणि आंतरराष्ट्रीय क्रिकेटमधून निवृत्ती जाहीर केली.
(5 / 9)
एबीडीने ११४ कसोटी सामने, २२८ वनडे आणि ७८ टी-20 सामन्यांनंतर आता आपण थांबत असल्याचे जाहीर केले. तो म्हणाला होता, की आता माझी पाळी आली आहे आणि खरं सांगायचं तर मी थकलो आहे". डिव्हिलियर्सने निवृत्तीच्या मागील दोन वर्षांत केवळ ४ कसोटी सामने खेळले होते, परंतु २०१८ मध्ये त्याने १४ डावांमध्ये १ शतक आणि ६ अर्धशतकांसह ५३.१६ च्या सरासरीने ६३८ धावा केल्या होत्या. अशा परिस्थितीतही त्याने निवृत्ती घेतली आणि क्रिकेट जगताला सर्वात मोठा धक्का दिला.
(6 / 9)
सौरव गांगुली- २००५-०६ मध्ये कोच ग्रेग चॅपेल यांच्याशी झालेल्या वादानंतर सौरव गांगुली याला संघातून वगळण्यात आले. यानंतर ग्रेग चॅपेल यांची हकालपट्टी झाली आणि नोव्हेंबर २००८ मध्ये दक्षिण आफ्रिकेविरुद्धच्या तीन कसोटी सामन्यांच्या मालिकेसाठी गांगुलीला संघात परत बोलावण्यात आले. पण त्यानंतर चांगली कामगिरी करत असतानाही ऑस्ट्रेलियातील तिरंगी सीबी सिरीजसाठी आश्चर्यकारकरित्या त्याला संघातून वगळण्यात आले.
(7 / 9)
यामुळे बीसीसीआयची निवड समिती संघातील वरिष्ठ खेळाडूंना निवृत्ती घेण्यास भाग पाडत आहे का, असा प्रश्न निर्माण झाला होता, मात्र कसोटी कर्णधार अनिल कुंबळेने त्याचे खंडन केले होते. पण अखेर गांगुलीने ऑस्ट्रेलियाविरुद्धच्या पहिल्या कसोटी सामन्याच्या दोन दिवस आधी पत्रकार परिषदेत आपण या मालिकेनंतर निवृत्ती घेत असल्याचे सांगितले.
(8 / 9)
पत्रकार परिषदेतील शेवटचा प्रश्न विचारल्यानंतर गांगुली म्हणाला होता, की "मी जाण्यापूर्वी फक्त एक शेवटची गोष्ट सांगू इच्छितो, ही माझी शेवटची मालिका असणार आहे. मी निवृत्ती घेण्याचा निर्णय घेतला आहे. इथे येण्यापूर्वी मी माझ्या सहकाऱ्यांना सांगितलं. हे ४ कसोटी सामने माझे शेवटचे असतील आणि आशा आहे की आम्ही विजयी कामगिरी करू. याच्या दोन दिवसांनंतर त्याने कबूल केले की, "वारंवार अपमानित होऊन कंटाळल्यामुळे आपण निवृत्तीचा निर्णय घेतला. "जर तुमच्या डोक्यावर सतत बंदूक असेल, तर तुम्ही हे किती दिवस सहन कराल? मी भारताकडून ४०० सामने खेळलो आहे. मी केवळ एका मालिकेत खराब खेळलो आहे. पण तरीही प्रत्येक टॉम, डिक आणि हॅरी संघात खेळत आहेत.
(9 / 9)
व्हीव्हीएस लक्ष्मण- व्हीव्हीएस लक्ष्मण १८ ऑगस्ट २०१२ रोजी निवृत्त झाला. त्यानेही अचानक निवृत्ती घेतली. त्याने निवृत्तीनंतर कबूल केले होते की, त्याची एवढ्या लवकर निवृत्ती घेण्याची कोणतीच योजना नव्हती. पण त्यालाही गांगुली किंवा राहुल द्रविडप्रमाणे वेगवेगळ्या फॉरमॅटमध्ये संघातून वगळले जाणे सहन झाले नाही. मात्र २०११ मध्ये भारताच्या इंग्लंड आणि ऑस्ट्रेलिया दौऱ्यात खराब फॉर्ममुळे त्याच्यावर टीकेची झोड उठली होती. लक्ष्मण याने एका भावनिक पत्रकार परिषदेत निवृत्तीची घोषणा केली.
(10 / 9)
सुरेश रैना- रैनाने त्याचा खास मित्र आणि कर्णधार एमएस धोनीसोबत आंतरराष्ट्रीय निवृत्तीची घोषणा केली. धोनीने निवृत्तीची घोषणा केल्यानंतर काही मिनिटातच रैनानेही चाहत्यांना धक्का दिला. रैनाने शेवटचा आंतरराष्ट्रीय सामना जुलै २०१८ मध्ये इंग्लंडविरुद्ध हेडिंग्ले येथे खेळला होता.
इतर गॅलरीज