Aapka Apna Zakir: कपिल शर्मासोबत तुलना होताच झाकीरनं हटकलं! एका वाक्यात केली ट्रोलर्सची बोलती बंद

स्टँड-अप कॉमेडियन झाकीर खान 'आपका अपना झाकीर' हा कॉमेडी शो होस्ट करण्यासाठी सज्ज झाला आहे. शोचा प्रीमियर १० ऑगस्ट २०२४ रोजी पार पडला आहे. हा शो सोनी टीव्हीवर प्रसारित होणार आहे. त्याचे भाग सोनी लिव्ह आणि ओटीटी प्ले प्रीमियमवर देखील स्ट्रीम केले जातील. झाकीरला त्याच्या शोच्या प्रमोशनदरम्यान नुकतेच कॉमेडियन कपिल शर्मासोबत केलेल्या तुलनेबद्दल विचारण्यात आले.

झाकीर खानचा शो कपिलच्या 'द कपिल शर्मा शो'च्या टाइम स्लॉटवर प्रसारित होत आहे. या तुलनेवरील झाकीरचे उत्तर आता लोकांचे लक्ष वेधून घेत आहे. एका मुलाखतीत झाकीर खानने सहकारी कॉमेडियन कपिल शर्माशी स्वतःची तुलना करण्यास नकार दिला, ज्याचा 'द कपिल शर्मा शो' त्याच वाहिनीवर प्रसारित झाला.

यावर झाकीर म्हणाला, 'मला तुलना करण्यात अडचण वाटते. तो एक महान कलाकार आहे, मी त्याच्याशी स्पर्धा कशी करू? जेव्हा कपिलचा शो मोठ्या प्रमाणावर यशस्वी झाला, तेव्हा दिल्लीत एक स्ट्रगलर कॉमेडियन म्हणून मलाही फायदा झाला होता.

'आपका अपना झाकीर' म्हणाला की, कलाक्षेत्रात एकानेही आपले काम चांगले केले, तर त्याचा सर्वांनाच फायदा होतो. उगवत्या सूर्याला त्याची सर्व किरणे कुठे कुठे पोहोचतात हे कळत नाही. त्याच्यामुळे प्रकाशमान झालेल्या घरातून मी आलो आहे. हे सांगायला मला लाज वाटत नाही. मी त्याचा खूप आदर करतो आणि तो माझ्याशी खूप प्रेमाने वागतो. मग आम्ही एकमेकांशी स्पर्धा कशी करणार? आम्ही फक्त आमचे काम करू.

झाकीर याआधीही अनेक शोमध्ये दिसला आहे. 'चाचा विधायक हैं हमारे', 'कॉमिकस्तान', 'वन माइक स्टँड', 'फर्जी मुशायरा' यांसारख्या वेब सीरिजमध्ये तो झळकला आहे. याशिवाय त्याने अनेक लाँग स्टँडअप स्पेशलही केले आहेत. २०१७मध्ये 'हक से सिंगल', २०१८मध्ये 'कक्षा ग्यारवी', २०२२मध्ये 'तथास्तु' आणि २०२३मध्ये 'मनपसंद', जे प्राइम व्हिडीओवर रिलीज झाले आहेत.