Jasprit Bumrah : कसोटीत सर्वात कमी चेंडूंत २०० विकेट कोणत्या गोलंदाजाने घेतले? बुमराहचा नंबर कितवा?

जसप्रीत बुमराह याने मेलबर्न कसोटीत ऑस्ट्रेलियाच्या दुसऱ्या डावात कसोटीत २०० बळी पूर्ण केले. २०१८ मध्ये बुमराहने दक्षिण आफ्रिकेविरुद्ध कसोटी पदार्पण केले होते. बुमराहने आपल्या ४४व्या कसोटीत २०० बळी पूर्ण केले. ट्रॅव्हिस हेडची विकेट ही त्याची कसोटीतील २०० वी विकेट होती. जसप्रीत बुमराहने ८४८४ चेंडूत २०० बळी पूर्ण केले. येथे आपण कसोटी क्रिकेटमध्ये सर्वात कमी चेंडू गोलंदाजी करून २०० बळी घेणाऱ्या गोलंदाजांबाबत जाणून घेणार आहोत.

वकार युनूस- ७७२५ चेंडू- पाकिस्तानचा माजी वेगवान गोलंदाज वकार युनूस हा कसोटीत सर्वात कमी चेंडूंवर २०० बळी घेणारा गोलंदाज आहे. वकारने १९८९ मध्ये सचिन तेंडुलकरसोबत कसोटी क्रिकेटमध्ये पदार्पण केले. १९९५ मध्ये त्याने २०० वी विकेट घेतली.

डेल स्टेन- ७८४८ चेंडू- कसोटी इतिहासातील सर्वोत्तम गोलंदाजांमध्ये डेल स्टेनची गणना केली जाते. अनेक वर्षे तो क्रमवारीत पहिल्या क्रमांकावर होता. स्टेनने कसोटीत ७८४८ चेंडूत २०० बळी पूर्ण केले होते. २०१९ मध्ये, स्टेनने निवृत्ती जाहीर केली.

कागिसो रबाडा- ८१५४ चेंडू- सक्रिय गोलंदाजांमध्ये दक्षिण आफ्रिकेच्या कागिसो रबाडाच्या नावावर सर्वात कमी चेंडूत २०० बळी घेण्याचा विक्रम आहे. रबाडाच्या मायदेशातील परिस्थिती वेगवान गोलंदाजांना खूप मदत करते. त्यामुळेच त्यांचे नाव या यादीत असणे आश्चर्यकारक नाही.

जसप्रीत बुमराह- ८४८४ चेंडू - जसप्रीत बुमराह सर्वात कमी चेंडूत २०० बळी घेणाऱ्या गोलंदाजांच्या यादीत चौथ्या स्थानावर आहे. बुमराहने कारकिर्दीतील ८४८४ व्या चेंडूवर ट्रॅव्हिस हेडला बाद केले. ३१ वर्षीय बुमराहने २०१८ मध्ये भारताकडून कसोटी पदार्पण केले.

माल्कम मार्शल- ९२३४ बॉल- जेव्हा क्रिकेटच्या इतिहासातील सर्वात घातक गोलंदाजाचा विचार केला जातो, तेव्हा सर्वप्रथम ज्या व्यक्तीच्या मनात येते ते म्हणजे माल्कम मार्शल. ८० च्या दशकात फलंदाजांमध्ये त्याच्या नावाचा धाक असायचा. त्यावेळी फलंदाज कमी जोखीम पत्करायचे पण त्यानंतरही मार्शलने ९२३४ चेंडूत २०० बळी पूर्ण केले होते.