Jammu Kashmir Result : दहशतवाद्यांकडून काका व वडिलांची हत्या, मुस्लीम बहुल भागात मुलीने फडकवला भाजपचा झेंडा
Who Is Shagun Parihar : शगुनने काही काळापूर्वीपर्यंत निवडणूक लढवण्याचा निर्णयही घेतला नव्हता, ती जम्मू-काश्मीर लोकसेवा आयोगाची तयारी करत होती. मात्र आता ती आमदार झाली आहे.
जम्मू-काश्मीरमधील किश्तवाड विधानसभा मतदारसंघातून भारतीय जनता पक्षाच्या उमेदवार शगुन परिहार विजयी झाल्या आहेत. त्यांनी नॅशनल कॉन्फरन्सच्या साजिद अहमद किचलू यांचा ५२१ मतांनी पराभव केला. शगुनने काही काळापूर्वीपर्यंत निवडणूक लढवण्याचा निर्णयही घेतला नव्हता, ती जम्मू-काश्मीर लोकसेवा आयोगाची तयारी करत सरकारी अधिकारी होण्याचे स्वप्न पाहत होती. पण ऐनवेळी भाजपने उमेदवारी दिल्यानंतर त्यांनी निवडणुकीच्या मैदानात उतरण्याचा निर्णय घेतला. भाजपने शगुन परिहार यांना किश्तवाडमधून उमेदवारी का दिली.. हे जाणून घेणेही महत्वाचे ठरते.
तसे पाहिले तर शगुन यांचे कुटुंब दीर्घकाळापासून भाजपशी संबंधित आहे. यापूर्वी त्यांनी निवडणूक न लढवण्याचा निर्णय घेतला असला तरी २६ ऑगस्ट रोजी भाजपने त्यांना उमेदवारी दिल्यानंतर त्यांनी निवडणुकीच्या रिंगणात उतरण्याचा निर्णय घेतला. विशेषत: २०१८ मध्ये त्यांचे वडील अजित परिहार आणि काका अनिल परिहार यांची दहशतवाद्यांनी हत्या केली होती, तेव्हा हा निर्णय त्यांच्यासाठी विशेष महत्त्वाचा होता. या दुर्दैवी घटनेमुळे किश्तवाडमध्ये तणाव निर्माण झाला आणि संचारबंदी लागू करावी लागली होती.
शगुन उच्च शिक्षित असून लोकसेवा आयोगाची तयारी करत आहे -
निवडणूक प्रचारादरम्यान शगुन म्हणाल्या की, मला दिलेले प्रत्येक मत केवळ आपल्या कुटुंबासाठी नाही तर दहशतवादामुळे आपल्या प्रियजनांना गमावलेल्या सर्व कुटुंबांसाठी आहे. आता त्यांच्या विजयानंतर शगुन यांची उमेदवारी भाजपसाठी राजकीयदृष्ट्या योग्य ठरल्याचे दिसून येत आहे. शगुनने एमटेकची पदवी घेतली असून सध्या ती डॉक्टरेट करत आहे. याशिवाय ती जम्मू-काश्मीर लोकसेवा आयोगाच्या परीक्षेची ही तयारी करत आहे.
या निवडणुकीत शगुन यांना २९,०५३ मते मिळाली आणि त्यांनी किचलू यांचा ५२१ मतांनी पराभव केला. मतमोजणी प्रक्रियेत त्यांनी आघाडी कायम ठेवली. नॅशनल कॉन्फरन्सचे उमेदवार किचलू यांनी २००२ आणि २००८ मध्ये या मतदारसंघातून विजय मिळवला होता. त्यांच्या वडिलांनीही तीन वेळा या मतदारसंघाचे प्रतिनिधित्व केले होते. त्यांना एकूण २८ हजार ५३२ मते मिळाली. पीडीपीचे फिरदौस अहमद टाक यांना केवळ ९९७ मतांवर समाधान मानावे लागले आणि त्यांचे डिपॉझिट जप्त झाले.
किश्तवाडच्या जनतेने माझ्यावर आणि माझ्या पक्षावर विश्वास दाखवला, त्यांना मी नमन करते. त्यांच्या पाठिंब्याचे मी मनापासून कौतुक करते. त्यांच्या पाठिंब्यामुळे मी भारावून गेल्याचे शगुनने म्हटले आहे. आपला विजय हा केवळ आपला नाही तर जम्मू-काश्मीरमधील राष्ट्रवादी जनतेचाही विजय आहे. हा त्यांचा आशीर्वाद आहे. शगुन म्हणाली की, किश्तवाडसमोरील ऐतिहासिक आव्हाने लक्षात घेता सुरक्षा सुनिश्चित करणे हे आपले सर्वोच्च प्राधान्य असेल. या भागात शांतता, प्रगती आणि समृद्धीसाठी प्रयत्न करा, असा जनतेचा संदेश आहे. परिसराच्या सुरक्षेसाठी मी काम करणार आहे.
किश्तवाडमध्ये शेकडो भाजप कार्यकर्त्यांनी एकत्र येऊन पारंपरिक ढोल-ताशांच्या गजरात आणि पक्षाच्या झेंड्यांसह शगुनच्या विजयाचा जल्लोष केला. तसेच विजयाचा जल्लोष करत 'इंडिया माता की जय'च्या घोषणा दिल्या.
संबंधित बातम्या