कोण आहे निमिषा प्रिया, १६ जुलैला येमेनमध्ये दिली जाणार फाशी; तिला अशी शिक्षा का देण्यात आली?
निमिषा प्रिया २०११ मध्ये येमेनमध्ये नर्स म्हणून काम करण्यासाठी गेली होती. तिचे पती आणि मुलगी २०१४ मध्ये भारतात परतले, परंतु कुटुंबाला आर्थिक आधार देण्यासाठी ती तेथेच राहिली.
केरळच्या पलक्कड जिल्ह्यातील नर्स निमिषा प्रियाला १६ जुलै रोजी येमेनची राजधानी सना येथे फासावर लटकवण्यात येणार आहे. २०१७ मध्ये येमेनी नागरिकाची हत्या केल्याप्रकरणी तिला दोषी ठरवण्यात आले होते. हे प्रकरण राजनैतिक गुंतागुंत आणि कायदेशीर गुंतागुंतीत अडकले आहे आणि भारत सरकारने केलेल्या सर्व प्रयत्नांनंतरही, अद्याप कोणतेही ठोस यश मिळालेले नाही.
कोण आहे निमिषा प्रिया?
निमिषा प्रिया २०११ मध्ये येमेनमध्ये नर्स म्हणून काम करण्यासाठी गेली होती. तिचे पती आणि मुलगी २०१४ मध्ये भारतात परतले, परंतु कुटुंबाला आर्थिक आधार देण्यासाठी ती तेथेच राहिली. येमेनचे नागरिक तलाल अब्दो महदी यांच्यासोबत मिळून तिने क्लिनिक सुरू केले. कारण परदेशी नागरिकांना स्थानिकांच्या सहकार्यानेच दवाखाने उघडण्याची परवानगी आहे. त्यानंतर निमिषाने आरोप केला की, मेहदीने बनावट कागदपत्रांचा वापर करून तिच्याशी लग्न करण्याचा दावा केला, तिचे लैंगिक आणि मानसिक शोषण केले, तिचा पासपोर्ट जप्त केला आणि तिला कैद करून ठेवले.
निमिषावर आरोप आहे की, तिने २०१७ मध्ये मेहदीला बेशुद्ध करण्यासाठी औषध दिले होते जेणेकरून ती पासपोर्ट घेऊन भारतात परत येऊ शकेल. पण मेहदी मरण पावले. त्यानंतर हनान या स्थानिक महिलेच्या मदतीने मृतदेहाचे तुकडे करून पाण्याच्या टाकीत फेकून दिले. २०२० मध्ये येमेनच्या न्यायालयाने तिला फाशीची शिक्षा सुनावली आणि २०२३ मध्ये हौथी प्रशासनाच्या सर्वोच्च न्यायिक परिषदेने हा निर्णय कायम ठेवला.
भारत सरकारचे प्रयत्न
याबाबत भारत सरकार सातत्याने सक्रिय आहे. येमेनमधील अधिकारी आणि निमिषाच्या कुटुंबीयांशी परराष्ट्र मंत्रालय सातत्याने संपर्कात असल्याचे अधिकाऱ्यांनी सांगितले. भारताने ब्लड मनीचा पर्यायही शोधला. येमेनच्या कायद्यानुसार पीडित कुटुंबाला नुकसान भरपाई देऊन माफी दिली जाऊ शकते. पण या दिशेने स्थानिक पातळीवरील चर्चा रखडली आहे.
संबंधित बातम्या