Atul Subhash : आत्महत्या केलेले एआय इंजिनीअर अतुल सुभाष यांचा पगार किती होता? पोटगी म्हणून पत्नीला देत होते अर्धं वेतन
Atul Subhash Suicide Case :आत्महत्या केलेल्या अतुल सुभाष यांचे काका पवन कुमार यांनी आरोप केला आहे की, त्यांच्या पुतण्याला पैशांसाठी त्रास दिला जात होता आणि पत्नी तसेच न्यायाधीशांनीही त्याचा अपमान केला होता.
Atul Subhash Salary : सॉफ्टवेअर इंजिनिअर असलेल्या अतुल सुभाष यांच्याबाबत मोठे खुलासे होत आहेत. आता त्यांच्या वकिलांनी सांगितले आहे की, कौटुंबिक न्यायालयाने सुभाषच्या पगारापैकी जवळपास अर्धा हिस्सा आपल्या मुलाला देण्याचे आदेश दिले होते. आत्महत्या करण्यापूर्वी इंजिनीअरने पत्नी निकिता सिंघानियासह सासरच्या अनेकांवर व्हिडिओ आणि सुसाईड नोट्सच्या माध्यमातून गंभीर आरोप केले आहेत.
एआय अभियंता अतुल सुभाष यांच्या आत्महत्येचे प्रकरण सोशल मीडियावर चांगलेच चर्चेत आले आहे. अनेकजण कलम ४९८ च्या न्यायसंहितेवर प्रश्नचिन्ह उपस्थित करत आहेत, ज्याचा अनेकदा गैरवापर केला जातो. दरम्यान, कौटुंबिक न्यायालयात अतुल सुभाष यांची केस लढणाऱ्या वकिलाने महत्त्वपूर्ण खुलासा केला आहे.
अतुल यांच्या आत्महत्येचे कारण न्यायालयाचा आदेश नसल्याचे वकील दिनेश मिश्रा यांनी सांगितले आहे. माध्यमांशी बोलताना वकील दिनेश मिश्रा यांनी सांगितले की, पती-पत्नी दोघेही आर्थिकदृष्ट्या मजबूत आहेत. पत्नीला चांगला पगार आहे आणि ती दिल्लीत काम करते, तर अतुल बंगळुरूमध्ये राहत होता आणि दरमहा ८४,००० रुपये कमावत होता. कौटुंबिक न्यायालयाने अतुल यांना त्यांच्या अल्पवयीन मुलासाठी दरमहा ४०,००० रुपये पालनपोषण भत्ता देण्याचे आदेश दिले होते.
वकिलांनी सांगितले की, बेंगळुरूमध्ये अतुलचा मासिक पगार सुमारे ८४,००० रुपये होता. जुलै महिन्यात उत्तर प्रदेशातील जौनपूर येथील कौटुंबिक न्यायालयाने अतुलच्या मुलाला दरमहा ४० हजार रुपये पोटगी देण्याचे आदेश दिले होते. हा आदेश विशेषतः मुलाच्या खर्चासाठी असून त्यात पत्नीसाठी कोणतीही तरतूद नसल्याचेही त्यांनी स्पष्ट केले.
चॅनेलशी बोलताना मिश्रा म्हणाले, 'अतुलला वाटले असेल की ४० हजार रुपये खूप जास्त आहेत. जर त्यांना ही रक्कम जास्त वाटत असेल तर त्यांनी या आदेशाला आव्हान देण्यासाठी उच्च न्यायालयात जायला हवे होते. त्यामुळे महिन्याला ४४ हजार रुपयांची बचत होत होती. ज्याच्या मदतीने त्याला बंगळुरूमध्ये भाड्यासह कुटुंबाचा खर्च चालवावा लागला.
अतुलची पत्नी चांगल्या कुटुंबातील होती आणि चांगली कमाई करायची, त्यामुळे कोर्टाने तिला पोटगी देण्याचे आदेश दिले नाहीत, असे त्याने सांगितले आहे. चॅनेलशी बोलताना वकील म्हणाले की, जर एखादी व्यक्ती आत्महत्या करत असेल तर कायदा आणि सुव्यवस्थेला दोष देऊ नये. या निकालात न्यायालयाने कायदेशीर प्रक्रियेचे पालन केले आहे, असे ते म्हणाले. आत्महत्येच्या या घटनेवर त्यांनी दु:खही व्यक्त केले आहे.
सुभाषचे काका पवन कुमार यांनी पीटीआयशी बोलताना आरोप केला की, पैशांसाठी त्यांच्या पुतण्याला त्रास दिला जात आहे आणि त्याची पत्नी आणि न्यायाधीशही त्याचा अपमान करत आहेत.
'जे घडले ते अत्यंत दुर्दैवी आहे. तो खटला हरत होता (जो त्याच्या पत्नीने दाखल केला होता). त्याचा छळ केला जात होता. ते (पत्नी आणि सासरे) त्याच्याकडे सतत पैशांची मागणी करत होते. आपल्या क्षमतेनुसार तो तिला (पत्नीला) मुलाच्या संगोपनासाठी पैसे देत होता.
सुरुवातीला कुटुंबीयांनी दरमहा ४० हजार रुपयांची मागणी केली, नंतर दुप्पट केली आणि नंतर सुभाषला एक लाख रुपये देण्यास सांगितले. सुभाषची पत्नी आणि तिचे सासरे आपल्या मुलाचे (सुभाषचा चार वर्षांचा मुलगा) पालनपोषण करण्याच्या बहाण्याने त्यांच्या पुतण्याकडून पैसे उकळत असल्याचा आरोप कुमार यांनी केला.
संबंधित बातम्या