देशासाठी आम्ही एकजूट; ऑपरेशन सिंदूरवर परदेशात सुप्रिया सुळेंनी मांडली भारताची भूमिका

काल मला केंद्रीय मंत्री किरेन रिजिजू यांचा फोन आला. त्यांनी मला यापैकी एका समितीचा भाग होण्यास सांगितले आहे. जेव्हा आपल्या देशाचा प्रश्न येतो तेव्हा आपण सर्व जण एकत्र येतो, राजकीय भेद बाजूला सारतो आणि आपल्या देशाचा दृष्टिकोन मांडण्यासाठी इतर देशांमध्ये जातो, हे अगदी स्पष्ट आहे, असे राष्ट्रवादी शरद पवार गटाच्या खासदार सुप्रिया सुळे यांनी सांगितले.

सुळे यांच्या म्हणण्यानुसार, प्रत्येक समितीत सुमारे पाच सदस्य असतील, जे सुमारे १० दिवस विविध देशांना भेट देतील आणि भारताची बाजू मजबूत करतील. या सर्व समित्या २३ ते २४ मे दरम्यान निघण्याची शक्यता आहे.

एनआयच्या रिपोर्टनुसार, सरकार सुमारे ४० बहुपक्षीय खासदारांच्या सात गटांमध्ये जगातील विविध देशांचा दौरा करण्याची योजना आखत आहे. आंतरराष्ट्रीय समुदायाला पाकिस्तानने पुरस्कृत आणि पोसलेल्या दहशतवादाची माहिती देणे आणि नुकत्याच झालेल्या ऑपरेशन सिंदूरची लक्ष्य आणि उद्दिष्टे अधोरेखित करणे हा या उपक्रमाचा उद्देश आहे.

हा दौरा २३ मे पासून सुरू होणार आहे. खासदारांचे गट अमेरिका, युनायटेड किंग्डम, संयुक्त अरब अमिराती, दक्षिण आफ्रिका आणि जपानसह जगातील अनेक प्रमुख राजधान्यांना भेट देऊ शकतात.