Viral News: मैत्रिणीला आयफोन गिफ्ट करण्यासाठी शाळेकरी मुलाचे खळबळजनक कृत्य, पालकांसह पोलीसही चक्रावले!

पोलिसांनी दिलेल्या माहितीनुसार, आरोपी मुलाने आपल्या आईची सोन्याची झुमके, सोन्याची अंगठी आणि सोनसाखळी काक्रोळा परिसरातील दोन वेगवेगळ्या सोनारांना विकली आणि मुलीसाठी महागडा आयफोन विकत घेतला.

शेरास सव्वाशेर..! खोट्या केसेसमध्ये अडकवण्याचा धाक दाखवून एकाने २० पोलिसांकडून उकळली खंडणी

पोलिसांनी कमल वर्मा नावाच्या ४० वर्षीय सोनाराला अटक केली असून एक सोन्याची अंगठी आणि कानाचे कान जप्त केले आहेत. द्वारका चे पोलीस उपायुक्त अंकित सिंह यांनी सांगितले की, ३ ऑगस्ट रोजी एका महिलेने घरफोडीची घटना नोंदवली होती, ज्यामध्ये तिने २ ऑगस्ट रोजी सकाळी ८.०० ते दुपारी ०३.०० वाजताच्या सुमारास घरात चोरी झाल्याचे पोलिसांना सांगितले. महिलेने आपल्या तक्रारीत तिच्या घरातून दोन सोनसाखळी, एक जोडी सोन्याचे कान आणि एक सोन्याची अंगठी चोरून नेल्याची पोलिसांत तक्रार दिली.

या तक्रारीच्या आधारे या प्रकरणी एफआयआर दाखल करण्यात आला असून तपास सुरू करण्यात आला आहे. घटनास्थळावरील सीसीटीव्ही फुटेज तपासण्यात आले. मात्र, घटनेच्या वेळी तक्रारदाराच्या घराजवळ कोणतीही संशयास्पद हालचाल आढळली नाही. पोलिसांनी आजूबाजूच्या परिसराची अधिक तपासणी केली, मात्र या दरम्यान कोणालाही संशयास्पद हालचाली दिसल्या नाहीत, असे डीसीपी यांनी सांगितले.

त्यानंतर पोलिसांनी बाहेरील व्यक्तींचा सहभाग नाकारून कुटुंबियांवर लक्ष केंद्रित केले असता तक्रारदाराचा मुलगा घरात चोरी झाल्यापासून बेपत्ता असल्याचे निदर्शनास आले. यानंतर पोलिसांनी अधिक माहिती गोळा करण्यास सुरुवात केली आणि त्याच्या शाळेतील मित्रांची चौकशी केली. आरोपी मुलाने ५० हजार रुपयांचा नवा आयफोन खरेदी केल्याची माहिती पोलिसांना मिळाली. त्यानंतर पोलिसांनी त्याचा शोध सुरू केला. परंतु, प्रत्येकवेळी तो पळून जाण्यात यशस्वी झाला. डीसीपी सिंह यांनी सांगितले की, मंगळवारी सायंकाळी सहा वाजताच्या सुमारास आरोपी मुलगा आपल्या घरी येणार असल्याची माहिती पोलिसांना मिळाली आणि त्यानंतर घराजवळ सापळा रचण्यात आला.

संध्याकाळी सव्वासहा वाजण्याच्या सुमारास अल्पवयीन मुलाला त्याच्या राहत्या घराजवळ रोखण्यात आले. पोलिसांचा सापळा ओळखून त्याने पळून जाण्याचा प्रयत्न केला, मात्र त्याला पकडण्यात आले. तपासादरम्यान त्याच्याकडून अ‍ॅपलचा मोबाइल जप्त करण्यात आला. त्याची चौकशी केली असता सुरुवातीला त्याने आपला सहभाग नाकारला, असे अधिकाऱ्याने सांगितले. मात्र, नंतर त्याने चोरीचे सोने दोन सोनारांना विकल्याची कबुली दिल्यानंतर वर्माला त्याच्या दुकानातून अटक करण्यात आली. अल्पवयीन मुलाने सांगितले की, तो नववीत शिकत असून नजफगढमधील एका खासगी शाळेत शिकत आहे. त्याच्या वडिलांचे आजारपणामुळे निधन झाले असून त्याला अभ्यासात रस नव्हता, असे डीसीपी म्हणाले.

'आरोपी मुलाचे त्याच्याच वर्गात शिकणाऱ्या एका मुलीसोबत त्याचे प्रेमसंबंध असल्याचे त्याच्या मित्रांनी पोलिसांना सांगितले. आपल्या मैत्रिणीच्या वाढदिवसानिमित्त तिच्यावर जबरदस्त छाप पाडण्यासाठी त्याने आईकडे पैसे मागितले. पण रक्कम जास्त असल्याने त्याच्या आईने त्याला नकार दिला आणि अभ्यासावर लक्ष केंद्रित करण्याचा सल्ला दिला. नकार दिल्याने संतापलेल्या त्याने घरातून पैसे चोरण्याचा निर्णय घेतला,' अशी माहिती डीसीपी यांनी दिली.