‘युद्धग्रस्त गाझा पट्टीचा ताबा अमेरिका घेईल’ : ट्रम्प यांच्या वक्तव्याने जगभरात खळबळ

इस्त्रायलचे पंतप्रधान बेंजमिन नेतन्याहू यांनी अमेरिकेची राजधानी वॉशिंग्टन येथे व्हाईट हाऊसमध्ये डोनाल्ड ट्रम्प यांची भेट घेतली. या भेटीनंतर उभयंताची पत्रकार परिषद झाली. त्या पत्रकार परिषदेत ट्रम्प यांनी हे वादग्रस्त वक्तव्य केले. अमेरिकेच्या राष्ट्राध्यक्षपदाचा दुसऱ्यांदा पदभार स्वीकारल्यानंतर डोनाल्‍ड ट्रम्प यांना भेटणारे नेतन्याहू हे पहिले परदेशी नेते ठरले आहे. 

गाझा पट्टीमध्ये सध्या युद्ध सुरू असताना पॅलेस्टिनी नागरिक गाझा पट्टीत पुन्हा परत येऊ शकतील का, असा प्रश्न पत्रकारांनी विचारलं असता ट्रम्प यांनी वरील उत्तर दिले. ट्रम्प म्हणाले, ‘ जे तेथे परत येऊ इच्छित नाही त्यांच्यासाठी आम्ही त्या जागी खरोखरच काहीतरी चांगले करू शकू. जर आपण त्यांच्यासाठी एखाद्या देशात काही बांधू शकतो आणि तो देश जॉर्डन किंवा इजिप्त असू शकतो. आपण तेथे चार-पाच किंवा सहा क्षेत्रे बांधू शकता. जेथे ते सुंदर जीवन जगू शकतील आणि दररोज मृत्यूची भीती राहणार नाही अशा भागात त्यांचे पुनर्वसन केले जाईल, असं मला वाटते.’ असं ट्रम्प म्हणाले.

ट्रम्प यांच्या वक्तव्यावर सौदी अरेबियाचा कडाडून विरोध

गाझा पट्टी ताब्यात घेण्याचा त्यांचा इरादा सौदी अरेबियाला मान्य असेल का, असं विचारलं असता ट्रम्प म्हणाले, ‘यामध्ये सौदी अरेबियाची भूमिका खूप उपयुक्त ठरणार आहे. त्यांना मध्यपूर्वेत शांतता हवी आहे... आम्ही ती जागा ताब्यात घेणार आहोत आणि आम्ही तिचा विकास करणार आहोत. तेथे हजारो नोकऱ्या निर्माण करणार आहोत. आणि संपूर्ण मध्यपूर्वेला अभिमान वाटेल अशी ही गोष्ट असेल.’

ट्रम्प यांच्या या पत्रकार परिषदेनंतर सौदी अरेबियाच्या परराष्ट्र मंत्रालयाने एका निवेदन जारी केले आहे. पॅलेस्टिनी राष्ट्राच्या बाजूने सौदी अरेबियाची भूमिका ही ‘ठाम आणि अढळ’ आहे. त्याशिवाय ते इस्रायलशी राजनैतिक संबंध प्रस्थापित करणार नाहीत. इस्रायलने पॅलेस्टिनी क्षेत्रात बांधलेल्या वसाहती, पॅलेस्टिनी जमीन ताब्यात घेणे आणि पॅलेस्टिनी लोकांना त्यांच्या भूमीतून विस्थापित करण्याचे प्रयत्न आदि विषयांबाबत सौदी अरेबियाने आपली भूमिका वेळोवेळी जाहीर केलेली आहे, असं या निवेदनात म्हटले आहे.