Viral Video: आधी देवाची पूजा केली अन् मग चोरले लाखो रुपये, पेट्रोल पंपावरील चोरीचा व्हिडिओ व्हायरल!

हा संपूर्ण प्रकार घटनास्थळावरील सीसीटीव्ही कॅमेऱ्यात कैद झाला, ज्यात एक व्यक्ती आपली ओळख लपवण्यासाठी स्वत:चा चेहरा कपड्याने झाकून पेट्रोल पंपाच्या कार्यालयात गुपचूप प्रवेश करतो. त्यानंतर दरवाजा सुरक्षितपणे बंद आहे का, याची खात्री करण्यासाठी मागे वळून बघतो. त्यावेळी त्याची नजर कोपऱ्यात असलेल्या एका लहानशा मंदिरावर पडते, ज्यात देवांचे फोटो आणि मूर्ती असते. हे पाहताच तो व्यक्ती चोरी करण्याआधी मंदिरासमोर आपले डोके टेकवतो. चोरीत यशस्वी होण्यासाठी त्याने असे कृत्य केले की, त्यामागे आणखी काही वेगळे कारण आहे, हे फक्त त्या व्यक्तीलाच ठाऊक आहे. 

Viral Video : बागेश्वर धामचे महंत धीरेंद्र शास्त्री यांच्याशी लहान भावाने सर्व संबंध तोडले! कारणही सांगितले!

मंदिरासमोर डोके टेकवल्यानंतर तो रोख रक्कम कुठे लपवली आहे, याचा शोध घेतो. यावेळी तो सीसीटीव्ही कॅमेरा फोडण्याचा देखील प्रयत्न करतो, जेणेकरून तो चोरी करताना रेकॉर्ड होऊ नये. परंतु, तसे करण्यात अपयशी ठरतो. त्यानंतर तो कार्यालयातील एक ड्रॉवर फोडतो. पोलिसांनी दिलेल्या माहितीनुसार, त्याने पेट्रोल पंपावरील सुमारे १ लाख ६० हजार रुपये चोरून नेल्याची तक्रार करण्यात आली आहे.

पोलिसांनी दिलेल्या माहितीनुसार, चोरीच्या वेळी पेट्रोल पंपाचे कर्मचारी झोपले होते. चोरी झाल्याचे त्यांच्या लक्षात येताच त्यांनी चोरट्याचा पाठलाग केला. मात्र, कर्मचाऱ्यांना चोराला पकडण्यात अपयश आले. पोलिसांनी कार्यालयातून लोखंडी रॉड आणि एक साडी जप्त केली असून आरोपींचा शोध सुरू आहे.

या घटनेचा व्हिडिओ अनेक वृत्तवाहिन्यांनी एक्सवर पोस्ट केला आणि चोराने गुन्हा करत असतानाही थांबून प्रार्थना करण्याची भक्ती पाहून प्रभावित झालेल्या सोशल मीडिया वापरकर्त्यांना आश्चर्याचा धक्का बसला.