काश्मीरमध्ये पहलगामसारखे आणखी हल्ले करू शकतो TRF? गुप्तचर विभागाच्या माहितीने यंत्रणा अलर्ट

द रेझिस्टन्स फोर्स या दहशतवादी संघटनेकडून आणखी काही टार्गेट किलिंगच्या घटना घडू शकतात, असे काश्मीरमध्ये तैनात वरिष्ठ अधिकाऱ्यांचे म्हणणे आहे. याअंतर्गत काश्मिरी पंडित, स्थलांतरित मजूर आणि सुरक्षा रक्षकांना लक्ष्य करण्याचा प्रयत्न होऊ शकतो. पहलगाम हल्ल्यात सहभागी असलेल्या एका स्थानिक दहशतवाद्याचे घर पाडण्यात आले तेव्हा दहशतवादी संघटनेने त्यावर एक व्हिडिओही जारी केला होता. अशा प्रकारे बुलडोझर कारवाई झाली तर हल्ले सुरूच राहतील, असे दहशतवादी संघटनेने म्हटले आहे. तेव्हापासून टार्गेट किलिंगच्या घटना घडू शकतात, अशी भीती व्यक्त केली जात आहे. जेएनयूच्या स्कूल ऑफ इंटरनॅशनल रिलेशन्सचे सहाय्यक प्राध्यापक संदीप कुमार सिंह म्हणाले की, भविष्यात पाकिस्तान आणि त्याचे समर्थक दहशतवादी संघटना या हल्ल्यांचा हत्यार म्हणून वापर करू शकतात.

संदीप कुमार म्हणाले की, २०१९ मध्ये जम्मू-काश्मीरमधून कलम ३७० हटवण्यात आलं होतं. तेव्हापासून पंचायत ते विधानसभेपर्यंतच्या निवडणुका शांततेत पार पडल्या आहेत. काश्मीरमध्ये पर्यटक जमा झाले असून स्थानिकांना रोजगार मिळाला आहे. वंदे भारत एक्सप्रेस श्रीनगरला पोहोचत असल्याने पाकिस्तानमध्ये भीतीचे वातावरण पसरले आहे. प्राध्यापक संदीप कुमार म्हणतात की, ज्या प्रकारे पाकिस्तानमध्ये अंतर्गत कलहाची परिस्थिती आहे आणि काश्मीरमधील वातावरण सातत्याने सुधारत आहे, त्यामुळे एकत्रीकरणाची प्रक्रिया वेगाने पुढे जाऊ शकते, अशी भीती आहे. अशा परिस्थितीत काश्मीर प्रश्नाकडे जगाचे लक्ष वेधण्याचा, स्थानिक पातळीवर वातावरण बिघडवण्याचा आणि टार्गेट किलिंगकरून जातीय तेढ निर्माण करण्याचा प्रयत्न होऊ शकतो.