Thane: ठाण्यात रेल्वे रुळांवर सेल्फी काढताना एक्स्प्रेस ट्रेननं उडवलं; २४ वर्षीय तरुणाचा मृत्यू

साहिर अली असे या व्यक्तीचे नाव असून तो मूळचा पश्चिम बंगालचा रहिवासी आहे. साहिर हा ठाण्यातील अंबरनाथ भागात त्याच्या नातेवाईकांना भेटायला आला होता, अशी माहिती रेल्वेचे वरिष्ठ पोलीस निरीक्षक पंढरी कांदे यांनी दिली. साहिर हा आपले नातेवाईक आणि मित्रांसह सेल्फी आणि ग्रुप फोटो काढण्यासाठी अंबरनाथ आणि बदलापूर स्थानकांदरम्यान असलेल्या उड्डाणपुलाखाली गेले. परंतु, सेल्फी काढत असताना पाठीमागून वेगाने येणाऱ्या कोयना एक्स्प्रेसने त्याला जोरदार धडक दिली. या धडकेत साहिरचा जागीच मृत्यू झाला.

या घटनेची माहिती मिळताच कल्याण जीआरपीचे कर्मचारी घटनास्थळी पोहोचले आणि त्यांनी साहिरचा मृतदेह शवविच्छेदनासाठी सरकारी रुग्णालयात पाठवला. याप्रकरणी पोलिसांनी अपघाती मृत्युची नोंद करून पुढील तपास सुरू केला आहे. रेल्वे आणि पोलिस अधिकाऱ्यांनी लोकांना रेल्वे रुळ ओलांडण्याचा आणि त्यावरून न चालण्याचा इशारा दिला आहे.